La Stagjon des Contis a… Romans!

Nuie di fâ, no rivin a stâ fers… L’Ostîr al à finît vuê matine che si faseve lusôr di mateâ cu lis contis de CorseCurte par scrivi i tocs par la RadioCorseCurte24, di dâju a Ticât dai Mus (Doman matine, miercus ai 17, ducj su OndeFurlane a 9.30), e cence nancje pierdi timp a lâ a durmî al è za che al met adun un copion par setemane che e ven.

Ma ce robe? Cuant? Dulà? Parcè? Cemût? Calme… calme. Ve chi la gnove, come simpri di gale.

Martars ai 23 di Avrîl, aes 20.30 sot sere, intal Centri Culturâl “Casa Candussi Pasiani” in place Garibaldi, 6, a Romans dal Lusinç, dentri di un schirie di apontaments che a festegjin la Fieste de Patrie, o sin ancje noaltris di Contecurte a presentâ il libri di Contecurte: La Stagjon des Contis, il prin libri di narative curte scrit di un coletîf, come che ben o savês, jessût de CorseCurte22. [E bon, curât dal Ostîr, ancje se il libri nol jere mighe malât]

Us metìn in zonte ca parsore la locandine di ducj i events, e ca sot chê solite che aromai nus puarte in tourné ator di ca e di là, che aromai lu savês, dopo de Gruesse Sorprese o sin lâts a Codroip e o sin lâts a Cjamin. E cumò anìn a Romans, e cun di plui inte serade de consegne dai atestâts, cuntun libri perfet par chei che a studiin il furlan, e cun di plui cun cualchi novitât intal spetacul che o vin sperimentât di pôc… Insome, o varìn contis curtis, ontecurtutis e ancje… nuie, no si spie. Cui che al è al savarà. Us spietìn!

1 comment