O savês ben che il nestri Ostîr al va a periodis… Al capite che al sedi ator dapardut come i savôrs e che al passi mês musan e fastidiât, come chescj ultins ca, che o vês ben viodût la Ostarie un pôc flape. (E un pocje di colpe le àn ancje il nestris contecurtârs che insome… nol è che a vedin mandât tantis contis).
Ma insome… stant che i periodis si clamin cussì parcè che prin o dopo a finissin, ve che al somee che alc si movi, e vuê us din un pâr di gnovis. La prime e je cheste ca che o vês ben viodût inte locandine. Ven a stâi che joibe cheste, a Gurize, inte suaze dal SloFest, di davuelzarà une serade cun cetancj autôrs des lenghis dal nord-est e juste par mostrâ che il furlan al ten bot cun chê altre leterature, o vin propite il nestri Ostîr, cul so ultin lavôr, Zaraton.
No vin tantis gnovis di spiâus, su la serade. O savin dut câs che si fevelarà di leterature in di di vuê, par talian, sloven, furlan, dialet de Benecie e framieç si scoltarà un pocje di musiche. Si tamesarà l’efiet des lenghis su lis oparis leteraris, tant al è vêr che Zaraton, il libri dal Ostîr che al fevele di vuê, di doman e dai fastidis par rivâ di un a chel altri, al è stât voltât intal so incipit sedi al talian, sedi par sloven. E viodìn se o varin une cerce…
Par cui che nol podarà sei viodarin di contâus alc plui indevant. Intant, a chei che a son des bandis di Gurize, o din apontament joibe di sere, ai 7 di Setembar, tor vot sot sere, tal curtîl dentri dal KB center, in vie Verdi.
