CorseCurte: classifichis di Dicembar e Sierade

E. JE. FINIDE!

No nus par vere, ma la CorseCurte e je finide e cualchidun si sint dal sigûr bielzà vuarfin de competizion fra contis che nus à tignût compagnie par un an intîr. Aromai o jeris ben usâts a lei tantis contis, a votâ, a viodi lis classifichis… Insome… E je stade une fature, ma che nus à regalât un an plen di contis (dal sigûr il plui prolific di dute la storie de Ostarie) e ancje un an fodrât di bielis contis, parcè che plui di cualchidun, cun chê di scugnî scrivi ogni mês, al à miorât il so stîl e al à tirât fûr ideis.

Ma po, soredut, e jere la competizion di stâi daûr e noaltris, daspò des votazions dal mês di Dicembar, o sin ca par dîus cui che al vinçût il mês, cui che al à vinçût il campionât di Sierade, e soredut cui che al rivât adore a vinci lis dôs classifichis gjenerâls, de CorseCurte e dal FantaCorseCurte!

E ae fin, o podìn disvelâus ancje i nons, e o scuvierzarês cui che al jere cui, dant reson ai vuestris suspiets, o magari lant incuintri a cualchi sorprese. Ben planc o comedarìn ancje lis contis di dut l’an, metint dentri il non vêr dal partecipant. Insome… sêso pronts? Scomencìn intant cu lis classifichis di Dicembar e di Sierade!

E nie… Ancje a Dicembar la gare le àn fate pe plui part lis scuadri plui in forme. Il Cjicechepicjedispicjelacite, cundut di une buine prestazion dai aversaris, al è rivât a ponisi denant par distac. Tocje inzenoglâsi al domini di cheste scuadre che e à pardabon paronât la competizion cuntun rendiment alt de prime ae ultime zornade.

Ma subit daûr il Lupusinfabula al à mostrât di jessi scuadre che e à fat un finâl di campionât in cressint, insiemi al Atletic Gjatui, e al Copasse Blu, a pâr, ducj i doi rivâts prins te classifiche di un zurât (e cjapant il bonus).

Il premi dal public lu à vinçût il Gjaline Padoane, cjapant i 5 ponts che lu àn sburtât adalt di almancul 5 posizions. Il secont puest al è lât invezit al Borussia Dordul, ancje se i 3 ponts cjapâts no àn morestât la flession di rendiment di cheste prestazion. Di segnalâ une zornade stuarte par il Sporting Brugnul e buinis prestazions par il Tapioca City e Argo Patùs, dilunc che il Volketitrai-Liga, si ben cuint (ma tierç cence i bonus), al à forsit vût ancje lui un pôc di tirâ il flât. Di segnalâ che ta chest mês, stant il clime di Nadâl, no son stadis dadis penalizazions (fasint une gracie al Fi di Marie dal Cafè che ogni tant si slungje masse).

Ma cui ajal vinçût, alore, la classifiche dal frêt (si fâs par mût di dî), ven a stâi dai mês di Otubar, Novembar e Dicembar? Vele ca sot.

E insome… ancje cheste classifiche e je stade a favôr dal Cjicechepicjedispicjelacite, ma al secont puest, prime volte premiât, l’Atletic Gjatui al à comedât il Borussia Dordul e il Copasse Blu. E ancje se o vin di dî che, come che al jere logjic spietâsi, la strache si è fate sintî e o vin vût il numar plui bas di partecipants… ben po, chest numar al è stât 19. In pratiche, in medie, a ogni mês dal an o vin vût une ventine di contis consegnadis e o crodìn che al sedi un sucès.

E in cheste classifiche, scrits in nerut, us mostrin ancje un altri dât… 15! A son stâts nuiemancul che in 15 di lôr che a àn son stâts simpri presincj ae Corsecurte, mandant 12 contis su 12, cence mai pierdi un colp. E a puedin stâ ben sodisfats! Lôr ma ancje noaltris de Ostarie, che ju vin stiçâts.