Corse Curte – Domandis e Rispuestis

DOMANDIS E RISPUESTIS

Mi plasarès tant partecipâ, ma no soi sigûr di rivâ a scrivi ogni mês une conte…
E ce probleme isal? Ta chel mês no tu scrivis nuie e tu cjapis zero ponts, amen. O pûr tu scrivis une fufigne di cualchi rie, tant pe presince, e cuissà, magari ultin no tu rivis e si cjape cualchi pont istès… In sumis, al è propit biel jessi ancje cuant che un mês no si è ispirâts o no si à timp.

A mi mi va di partecipâ, ma no ai tante voie di impegnâmi, puedio istès?
Ma cjale… o disarès ancjemò miôr. Tal sens che al è biel vê ancje cui che al partecipe cence spirt competitîf, juste pal gust di scrivi alc par furlan, fossial ancje cualchi rie mâl bastide, o magari dome par imparâ o sburtâsi a scrivi par furlan, cence fâsi cjapâ de sflacje. In sumis… sì!

E se il teme no mi plâs? O no mi ven nuie tal cjâf?
Dificil che al sucedi. Il teme al sarà simpri une vore gjeneric, di maniere che si puedi interpretâ in tantis manieris. E cuant che si à un teme tal cjâf, cualchi idee e rive simpri.

Aio di sielzi par scugnî un non che al ricuardi une scuadre di balon?
Nuuuu! Posisappo! E je dome une maniere par divertîsi e fâ fente che al sedi un campionât di contis. Si pues sielzi cualsisei non, baste che al sedi figo e che nol disveli il vêr non dal partecipant.

Ma si puedie savê miôr i timps par scrivi e votâ?
Alore… I timps a son plui o mancul chescj. Par cui che al scrîf, ai 5 dal mês o publichìn la liste des contis rivadis tal mês prime e il teme pal mês dopo. Si à timp di li fintremai ae fin dal mês par mandâ la conte. Par cui che al lei, invezit, dai 2 ai 5 dal mês o publichìn lis contis sul sît, e dai 5 ai 15 si pues votâ la conte che si à miôr, par fâ part de jurie dal public e partecipâ al FantaCorseCurte.

Ma cemût si votie?
Facil, dopo vê let lis contis, si sielç chê che si à miôr e si lu scrîf intun coment al post dulà che e je la liste des contis di chel mês.

Ma par votâ si saial cui che al à scrit la conte?
Fin ae publicazion de classifiche, no si sa. Dopo dai 15 o metarìn i nons dai concorints, cussì cui che al vote (e al scomet) lu fâs su la conte e no su la scuadre.

Ce isal il FantaCorseCurte?
Cuant che un al vote lis contis e al sielç chê che i plâs di plui, in pratiche al scomet su la conte, come se al fos un cjaval intune corse, si che, al cjaparà ancje lui i ponts che e cjape chê conte. Baste comentâ simpri cun chel non e ve li, che o varìn une classifiche dai letôrs… il FantaCorseCurte!

Aio di scugnî disvelâ il gno non, ae fin dal an?
Ma cjale… se tu âs voie di vê la cene paiade, sì; ma se no ti va, nissun fastidi. Al baste che lu sepi l’Ostîr cuant che tu ti iscrivis, che al tignarà ben platât i nons fin ae fin de competizion, o ancje par simpri.

E se si iscrivin in tancj e e salte fûr une sdrume di contis di lei?
Magari! Sarès bielonon! E nol sarès nissun fastidi… Fasarìn doi zirons!

Ma se soi un partecipant, ma o ai gust di jessi ancje un letôr e partecipâ al FantaCorsecurte, cun ce non votio? E se mi cognossin?
Ma cjale, ten cont che nol è un probleme savê che un scritôr al è ancje un letôr. Al è scrit tal regolament. Si che duncje, la robe miôr, e je che tu votis cul to non, e pôc mâl se un al sospiete che un cierte conte tu le vedis scrite propit tu. Visiti che al è un zûc, no une competizion.

_________________
Se tu âs une domande, fâsile intai coments, e tu la cjatarâs achì, rispuindude!

Par lei il regolament, frache achì.

3 comments