Scoltecurte #3: Fûr dai semenâts

Le vin clamade Fûr dai semenâts, cheste tierce puntade di Scoltecurte, ma e je colpe soredut dal Famei e de Sartore. Il Famei parcè che al à scrite la conte Nekronomikon e la sartore parcè che e à sielzût di leile. Ma il fat che si clami alc “fûr” dai semenâts al met dongje la idee che altris robis a sedin dentri, di chescj semenâts… ma sino sigûrs? Nol è che magari ce che o pensin che al sedi dentri al è dome maiorance, robe plui fuarte, plui cognossude o plui sparniçade? Nol che il semenât a nol esist e al è dome une invenzion di comût? Probabil. Ma dopo, clare, cuant che si cjate revocs di sureâl e di ironie che ti puartin fûr di chest, come in chestis contis, a nô nus va benon di stâ fûr e gjoldisal.

Ma tornìn a la prime conte, chê dal Famei, sielzude e lete de nestre Sartore Astrid. Che al sedi un visionari lu savin, ma chest so jessi visionari al torni dispes cui pîts par tiere intun lamp, ancje chel lu savin. E al devi jessi plasût il sô viaç intun univiers che nol pâr nestri ma che Lovecraft al à creât e che la conte (Zenâr 2018) e dopre. Il libri maladet di un arap mat lu cognossin un pôc ducj, e al è simpri stiçât un ciert gjenar di fantasie (ancje se dopo lu si cjate in biblioteche). Podopo, leint, e scoltant, forsit cualchi cjatade dal Checo, come i siei maiuscui, lis sôs K e Y, a van a pierdisi, ma si vuadagne il podê lassâsi lâ inte scolte di Nekronomikon cence la fature di lei, che al è simpri un pês. E si sa, par svolâ bisugne jessi lizêrs.

Seconde storie di cheste pontade di Scoltecurte e je une altre Ecumène, ven a stâi una traduzion di une conte in altris lenghis. E nus al à regale il nestri Pablo, il Cramâr, che al volte dret dal rus une conte che si clame la limonade, e che ancje chi e dopre la ironie par fâ satire politiche e meti sui dincj une ridade mareose. La conte e je une piçule zoie, e o conseìn pardabon di scoltâle, parcè che inte version furlane (no vin idee di cemût che e sedi in rus) e rint une vore. La situazione contade e je al limit dal ridicul e dal tragjic, ma propit chest sô jessi sureâl, cuntune prime persone che nus da la sô vision de robe, e permet di gjoldile al massim. E po dopo, insome… si fevelial pardabon di limonade? Scoltaitle inte leture dal nestri Dorondon che le à – cun cualchi sugjeriment – sielzude.

E in ultim, par cheste prime schirie di Scoltiscurtis, o vin invidât un Ospit. Lu vin cognossût inte suaze di Suns Friûl, e o vin pensât di lâ subit a rompi i c… a domandâi un plasê. Lui al è Alvise Nodale, e al met in musiche storiis par furlan che a son pardabon di scoltâ. Ve chi alc cjolt dal tubo se o volês dâi un cuc, e lu cjatais ancje su Spotify. Insome… al reste che nus à dite subite di sì, al sielzût une des contis che i vin proponût e nus à regalade la leture. E al è ancje brâf! La conte e je une cjolte dal ContecurteDay 2018, si clame Une sentence tribolade e le à scrite il nestri Massim Furlan. Il personaç al è un avonde fûr dai semenâts… ma no vin voie di disvelâ cui che al è, se no us ruvinìn la conte. Par scuvierzilu, dopo vêle scoltade, vês di fracâ sul leam e scuvierzi di cui che si fevelave.

E ancje par cheste tierce Scoltecurte al è dut: BUINE SCOLTE… CURTE!

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît