Kohoutek

A.D. 1974
La stanzie e je frede ta chest mês di Zenâr. Jo no sai cemût che a fasin a resisti i selvuçans. Jo no sai cemût che io stes o rivi a resisti. O vin dome un covertôr blanc parsore dal ninsûl.
Doi jetuts. Jo e Jano. Un par jet. Oglala al è cui nonos a recitâ lis litaniis ora pro eis tal jet grant ta chê altre stanzie de cjase coloniche.
O feveli de la cometa del secolo.
O soi un astronom in potence e, ancje se o fâs lis elementârs, o sai dut dal systeme solâr e o cjali pe television ducj i documentaris di astronomie. O sint i suns stelârs e o soi plen di maravee pai nûi di stelis.
La comete Kohoutek e varès di jessi une vore visibil ma jo no ai ancjemò viodût nuie. Me pari al à dit di vêle viodude e jal à dit a Diego, chel des stelis.
O spieghi dut a Jano prime di indurmidîmi.
Une volte al jere vignût un grant aiaron e i scûrs si vierzevin. No vevin ni altri par parâsi. Ma o stoi fevelant dai agns ’50. Il nono al rivà cuntun toc di filistrinat a peâ chei scûrs.
Cumò o sin avonde parâts, se no altri a son i veris. Ma chel piçul covertorut blanc no nus riscjalde par nuie. Si resist.
O soi un mestri, ancje se o ai dome 11 agns.
Pecjât no vêle viodude, chê comete. Rivade dongje dal Soreli al devi di jessi sucedût alc… no si le viodeve plui tant ben.

A passin i agns.
O sin tal 2016.
O ai une stanzie riscjaldade. O soi plen di cuviertis e di maions. Ma o ai tant frêt.
O ai in man un libri di astronomie.
O ai viodût une grande comete tal ’97.

O ai tante pôre.
Il mont lu viôt dut cuintri di me.

di Checo Tam
#931