Kohoutek

A.D. 1974
La stanzie e je frede ta chest mês di Zenâr. Jo no sai cemût che a fasin a resisti i selvuçans. Jo no sai cemût che io stes o rivi a resisti. O vin dome un covertôr blanc parsore dal ninsûl.
Doi jetuts. Jo e Jano. Un par jet. Oglala al è cui nonos a recitâ lis litaniis ora pro eis tal jet grant ta chê altre stanzie de cjase coloniche.
O feveli de la cometa del secolo.
O soi un astronom in potence e, ancje se o fâs lis elementârs, o sai dut dal systeme solâr e o cjali pe television ducj i documentaris di astronomie. O sint i suns stelârs e o soi plen di maravee pai nûi di stelis.
La comete Kohoutek e varès di jessi une vore visibil ma jo no ai ancjemò viodût nuie. Me pari al à dit di vêle viodude e jal à dit a Diego, chel des stelis.
O spieghi dut a Jano prime di indurmidîmi.
Une volte al jere vignût un grant aiaron e i scûrs si vierzevin. No vevin ni altri par parâsi. Ma o stoi fevelant dai agns ’50. Il nono al rivà cuntun toc di filistrinat a peâ chei scûrs.
Cumò o sin avonde parâts, se no altri a son i veris. Ma chel piçul covertorut blanc no nus riscjalde par nuie. Si resist.
O soi un mestri, ancje se o ai dome 11 agns.
Pecjât no vêle viodude, chê comete. Rivade dongje dal Soreli al devi di jessi sucedût alc… no si le viodeve plui tant ben.

A passin i agns.
O sin tal 2016.
O ai une stanzie riscjaldade. O soi plen di cuviertis e di maions. Ma o ai tant frêt.
O ai in man un libri di astronomie.
O ai viodût une grande comete tal ’97.

O ai tante pôre.
Il mont lu viôt dut cuintri di me.

di Checo Tam
#931

1 coments On Kohoutek

  • Oltri le musiche, le passion dal Checo e grampe sul dut ce ator dal nestri globo, e cul so râr e originâl mût di poia i soi pinsîrs su cjarte, al fâs des contis che misture rare e curiose che rint ai voi graziose leture. Lussian

Lasse une rispueste a Anonim Cancele rispueste

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît