Il misteri dal ûf clop

Bepino, che al à il diaul sul copìn, al è trement in dut ce che al fâs, che se al metès ancje a scuele dut l’impegn che al met a fâ malegraciis, al sarès bielzà laureât a dodis agns. Vuê al sta zuiant cun la fionde e no content di tirâ a robis che a stan fermis, al pense ben di cjatâ bersais in moviment, che al è plui dificil cjapâju. Zirant ca e la pal curtîl al sint cocodecâ lis gjalinis tal pulinâr e i ven subit la gole di tirai a lôr, che di sigûr no stan mai fermis.
Al secont o tierç tîr al beche une su la schene, che e tache a cori pal pulinâr come une mate, fasint un casin dal diaul. Cun chest davoi al è dificil becant une ma a fuarce di tirâ al centre une gjaline intal cjâf, che e cole come muarte. Bepino al si rint cont di vêle fate gruesse e al jes di corse dal pulinâr, fasint il gnogno par no dâ tal voli. La gjaline dopo un pôc e rinven, ma e reste come instupidide, lant ca e la pal pulinâr come cjoche; di sigûr il clap i a ofindût il cerviel.
Il nono Sisto, che di lontan al veve viodût Bepino a tirâ cun la fionde a lis gjalinis, al jes di corse dal ort, lu brinche par une orele e cence tancj compliments i dâ doi scufiots e i romp la fionde“Cussì tu imparis a no fâ dal mâl a lis gjalinis!” al sbroche inrabiât.
Il dì dopo Teresine si inacuarç che un dai ûfs tirâts sù de cove al è clop e chest al sucêt ogni dì, fasintle lâ in bestie. Par scuvierzi cuale che e je la gjaline che e fâs l’ûf clop, je e stâ atente e e ten di voli la gjaline che cul sô cocodecâ e vise che e à a pene fat l’ûf. Cun chest ûf e côr in cjase e lu romp, par controlâ se al è bon o se al è clop.
Tal zîr di une setemane e rive a scuvierzi la colpevule e par sierâ i conts i tire il cuel e la met in padiele.
Cumò Teresine no cjate plui ûfs clops in te cove e si met il cûr in pâs, ancje se no savarà mai il parcè che cheste gjaline e veve cheste tare.
Bepino, dopo i scapelots di so nono, al zire a la largje dal pulinâr.

di Pauli Jacuz

#883