Cjopris, ai 21 di Avrîl dal 2022
Biblioteche comunâl
Aromai lu san ducj, che al nestri Ostîr no i plâs fâ lis presentazions dai siei libris. Sì che, za lis primis voltis, ai timps des Contis di Famee, al meteve dentri contis ineditis e leturis dal so famei, par fâ scoltâ lis contis, invezit che fevelâ di lôr.Ben po… ce no ti aial pensât cun chest “Cryptofriûl”, che al à viodude la prime presentazion “avonde normâl” propite un pâr di setemanis prin a Listize? Nuiemancul che un spetacul intîr fat sù ator ator dal libri!
La idee i è vignude propite cjalant chei bintars de Osterie a lei i tocs dal libri, che a son une vore diferents. Si podeve meti adun une sorte di fiction, al à pensât, dulà che ogni letôr al jere un espert di alc, e al contave la sô vision de storie. Si podeve meti adun une sorte di fiction, al à pensât, dulà che ogni letôr al jere un espert di alc, e al contave la sô vision de storie. Ma lis storiis di Cryptofriûl a son novelis, e no contis curtis… cemût la metìno? Facil… al covente un che al conti la storie, contune narazion orâl che e sbusi lis leturis tant che un fîl cuntune golaine. Insome… ve chi, di chest al è nassût “Un viaç tal Cryptofriûl”, une idee che e à metût dongje ancje une part visive, fondamentâl par lassâ ae int dal public (che chest colp a son propit spetadôrs) lis imagjins di ce che la storie i contave. La conte sielzude par jessi rapresentade e je stade la prime dal libri, Lusignis, sedi parcè che e jere ambientade in plane, sedi parcè che e veve une buine dose di maravee bielzà a mostrâ une fotografie o adiriture un video de “motoruota”, bestie protagoniste de conte, insiemi al cjan che al mangje il titul.
Ae serade o vin vût ducj, robe incredibile, dal Famei innomenât atôr francês Checo Françoise Tami Tam, ae esperte dal Deep Web Astrid Wirilgren Virili, ae zooliche Serena Serene Vögelin Fogolini, ae gjornaliste Margherita Margreth Cogoviç Cogoi, al menebigui Michele Berto Agnule Londero. L’Ostîr, clare, al presentave la sô storie, in vieste di Rafaêl Raphaël Seraphin Serafin. E par no fâsi mancjâ nuie, a spelâsi lis mans intal public o vin vût ancje il Cramâr Pablo Gortan. Lis fotografiis ae fin serade, intune sale plene plene di int, a mostrin che o sin propit stâts contents de robe.
Un supergraciis al va dite al Comun di Cjopris-Viscon, che – vie Sandri Pian – al à vude la idee di coinvolzinus in cheste serade che e je stade superfurlane, stant che si son consegnâts i diplomis ai partecipants dal cors di marilenghe.
- Articul su la ostarie cu la presentazion dal event
- Presentazion dal libri sul sît di Gelo Stellato
- Dulà cjatâ il libri Cryptofriûl
