Viscon, ai 25 di Avost dal 2022
Bearç in bande de glesie
Cuant che o vevin metût adun la prime pontade dal Spetacul “Un viaç tal Cryptofriûl”, pensât tant che un talk show televisîf, o vevin pensât che al sarès stât biel fâ ancje une seconde pontade, doprant une altre storie dal libri.
Ben po… le vin cumbinade; e propit in gracie dal Comun di Cjopris-Viscon che al à tignût a batisim la prime e al à stiçât par fâ la seconde. Se inte prime o vevin doprade la prime conte di Cryptofriûl, in cheste ca o vin fat un balç di una sessantine di agns e o sin lâts in mont, a Sauris, par contâ la ultime conte, chê de Magne di mont e des vicendis peadis ae mont Bivare.
Come simpri, cuant che si va a meti adun la robe, si à pôre di no cjatâ materiâl, e invezit o vin scuvierzût che no dome si cjate, ma ‘nd è ancje di gnûf, cun cualchi interviste e fotografie che o vin tirât subit dentri tal contâ di Raphaël Seraphin, presentadôr de serade, e tes leturis di Françoise Tamì, atôr e letôr francês che al à dât pathos ae vicende. Jenfri i ospits, come simpri, la zooliche Serene Vögelin e la gjornaliste e storiche Margreth Cogoviç. Ma il clou de serade, dal sigûr, e je stade la comparse jenfri dal public di un ospit internazionâl, Mike Berlon, che al à puartât i siei video par lassâ scaturide dute la int dal public. E cun di plui, cuntune gjatemarangule a fâ fotografiis o vin ancje une biel pocjis di testemoneancis visivis.
Di contâ, de serade, il fat che la nestre esperte di Deep Web, Astrid Wirilgren, e à pensât ben di smenteâ il cavo che i coventave, ma la cavalerie e je rivade cun altris doi ordenadôrs e o vin cumbinât. L’Ostîr e Mike a àn fat un pôc di circ a inizi serade, e cuissà se cualchidun al è colât tal tramai dal lôr improbabil inglês.
La vicende, si diseve, e je chê dal esercit talian che tal 1978-79 al à pensât ben di demanializâ la mont Bivare e altris parts dal osovan. Cun contâ une vicende te vicende, che si pues lei tal libri, o vin cirût di puartâ il public dentri te maravee, par fâi scuvierzi alc dal Friûl che magari nol cognosseve o in ogni câs fâsi inmagâ de storie. Jessude? Sì, a viodi dal ben acet al pâr propit che la serade e sedi rivade tal sô intent. E noaltris dal trop o sin une vore contents di cuant che lis contis in cjar e vues a saltin fûr ben.
- Articul cu la croniche dal event
- Articul di presentazion dal event
- Presentazion dal libri sul sît di Gelo Stellato
- Dulà cjatâ il libri Cryptofriûl
