CorseCurteNovembar#02 – Albe ocitane

#02 – Albe ocitane

La sentinele nus visave simpri a pene che une lûs blancje e comparive parsore de rie di bassis montagnis a orient di Tolose. E cussì il gno amant al leve vie par une galarie segrete che i vierzevi jo stesse. Dopo cent pas il gno amant al saltave fûr dal cjastiel e si pierdeve intal bosc. Jo e gno marît, il cont, di solit o durmivin in cjamaris separadis dal cjastiel ma ogni matine, al cricâ dal dì, lui al vignive a tucâmi inte puarte par viodi cemût che o stevi. Nol veve di savê che jo in ciertis gnots o ospitavi te mê stanzie un altri om, un cavalîr. E alore la sentinele nus visave che e steve rivant la albe e che jo o varès vût di mandâ vie il gno cjâr amant. Ma la sentinele e jere une femine, la vecje coghe Cunegonde, che di gnot spes no rivave a durmî. E alore e steve sù, simpri in vuaite a ogni rumôr sospiet.
Pûr trop e capità une gnot che Cunegonde e bevè masse vin e si indurmidì. E cussì jo e il mio cavalîr no forin visâts che e steve rivant la albe. Al rivà il cont a tucâ e jo no fasei in timp a vierzi la puartute dal passaç segret par fâ lâ vie il gno amant. Insome, o forin sorprindûts e in cuatri e cuatri vot la mê stanzie si jemplà di vuardiis clamadis dal cont. Il mio cavalîr al disfodrà la spade e al ferì un pâr di soldâts prime di vignî copât.
Jo, par punizion, o finii la mê vite intune cele cence barcons. E no rivi a viodi plui il cîl. No rivi a distingui la dì de gnot. No sai se in chest moment e je la albe, la maladete albe che e sierave lis nestris gnots di amôr. Ma tant, aromai, al e dut pierdût.

di ***
#1***

1 comment