Coghis, Dorondons e Ostîrs ator par Codroip

O vin pandût pôc timp indaûr la gnove dal viaç tal Cryptofriûl partint di Muçane, e us spietìn ducj, ma no varessin voie che a pensassis che noaltris o stin cu lis mans in man.

La coghe, juste par dî une, doman di sere, Vinars ai 14 di Otubar, e je a presentâ un libri inte suaze de Fiere di San Simon a Codroip. Cuâl libri? Ma nuiemancul di “Il furlan queneau ti stufe” di Carlo Tolazzi! E noaltris chest libri no dome lu vin let, ma lu vin ancje regalât tant che premi pe CorseCurte al campion di Vierte. Insome… o savìn bielzà che la nestre Coghe e à fat un lavoron e che e saltarà fûr une super presentazion, ancje parcè che il libri al è una vore zuarin e conseât par chei che ur plâs zuiâ cu la lenghe.

Achì o cjatais il pdf di ducj i spetacui di Codroip, ma us disin ben no di lâ in Corte Zoffi (sot il puartic, pe vie principâl di codroip) li dal cafè Pablo, aes 18.30 e li o cjatarês Coghe, Tolazzi e cuissà, cualchidun altri de Ostarie a viodi. Vait!

E plui indevant, ma us al disìn cumò, ven a stâi ai 22 di Otubar, sabide di sere, simpri aes 18.30 sot sere, li de Ostarie Là di Galas, in vie Rome (e podevie sei diferent?) il Dorondon de Osterie Jacum al presentarà nuiemancul che il vuestri Ostîr par fevelâ di Cryptofriûl, il libri dal San Simon dal àn passât, che us fevele di vicendis furlanis dal ultin secul une vore pôc cognossudis.

Ancje ca, us consein di jessi, ma no par il libri, che tant lu cognossês, si ben par profitâ che o sin intune ostarie e che si pues lei un tai cjacarant di leterature, che po e sarès la idee che e à fat nassi cheste ostarie. E ancje ca, dal sigûr, chei di contecurte a saran.

benon… Si viodìn!