El Futre

A Cuyo, tal ovest de Argjentine e in Cîl, si clame Futre une persone vistude intune maniere elegante. E di chês bandis si da chest non ancje ae popolâr liende di “El Futre” .
Ae fin dal secul Disenûf, si costruì une spetacolâr opare di inzegnarie, la ferovie transandine, che e tire dongje la citât di Mendoza in Argjentine cun chê di “los Andes” in Cîl.
La liende dal Futre e fevele di un personaç inglês vistût in mût elegant, dut di neri, cuntun cjapiel di cope alte che si ocupave dal paiament dai operaris e che si stabilì par cualchi dì a “Las Cuevas”, te provincie di Mendoza in Argjentine, par paiâ i lavoradôrs. Vie pe gnot al ven copât par robâi i bêçs. Si suspiete che i operaris a sedin stâts lôr a copâlu, par svindicâsi de sô tristerie.

E conte la liende che di chê volte, indenant vie pes gnots, chest personaç al salti fûr e al tachi sù di chei che a cjaminin su lis monts e no àn paiât i debits. Biel montant parsore dal so cjaval, cul cjâf in man, al ven dongje par domandâ i siei francs.
Si dîs che il Futre no i dà cuintri a ducj, ma dome a chei che a àn la cussience sporcje.

Agns indaûr cuant che jere a sta cun la mê fame a Mendoza e i miei fîs a jerin piçui, a àn vivut la pôre dal Futre. Nô o levin in feriis a “Potrerillo”, un paisut de mont, e intant che a zuiavin pal prat ju svicinà un paisan par dîur di lâ a cjase di corse parcè che e rivave la gnot e al podeve saltâ fûr il Futre, un om cence cjâf che al vagolave pes monts sore dal so cjaval e che al cjapave i frutins che a jerin ancjemò li di fûr.

I fruts a jerin corûts svelts a cjase ma di bot e sclop si sintì il galop di un cjaval, e lôr, muarts di pôre a jerin lâts a metisi sot dal jet. Sgrisulant a disevin che al vignive l‘om cence cjâf. Ve ca, ce triste che o soi: no i ai dite che cui che al galopave al jere un biel cjaval blanc che al coreve libar di bessôl pai cjamps.

di Cristina Degli Uomini
#1387