CorseCurteAvost#15 – Tormenton estîf

#15 – Tormenton estîf

“Stasera mi butto” al berlave Rocky Roberts tal juke-box sul puarti di grisiolis de splaze e lui, sentât sul muret in face al mâr, i veve domandât sot vôs:
– Vuelistu jessi la mê morose?
– No sai – i veve rispuindût jê.
No saveve nancje jê ce che no saveve: e veve dome cuindis agns e chê e jere la prime volte vie di cjase di bessole cu la sô amie un pôc plui dispatussade di etât.
Une vacance meretade dopo tant studiâ: jù pal dì distirade sul savalon a bronzeâsi, a scrivi “T’amo sulla sabbia”, a svuacarâ te aghe, a ridi par nuie e tabaiâ di monadis.
E simpri cun lui a puartade di vôs e di zûcs su la rasule.
E la sere? Ah, la sere, la amie si le mocave cun chel di turni e il soreli, ros di vergogne par no podê fermâ il timp, al jentrave tal mâr e che maravee e gjavave il respîr: lis lôr mans si cirivin e il cûr al dave di mat.
Dopo il bagn di miezegnot, la lune e slusive cussì sflandorose che nol jere mai scûr avonde par robâsi in pâs une bussade o il sgrisul di une cjarece su la piel tirade dal sâl.
I moments biei, si sa, a fasin passâ il timp ae svelte.
Al podeve ben Riccardo Del Turco cjantâ sul puarti “Luglio, col bene che ti voglio, vedrai non finirà”; si svicinave la ore di saludâsi.
Prin di partî, lui i veve metût in man un pacut:
– Al è par te – i veve dit – Jo il mês cu ven o voi soldât, ma dopo o tornarai a cirîti. Vuelistu restâ la mê morose?
– Sì – i veve rispuindût jê.
Po, cence spietâ altri, e veve sbregât la cjarte; il pacut al involuçave il disc di Jimmy Fontana cu la cjançon che lui al veve metût tal jukebox ogni sante dì: “Pensiamoci ogni sera al tramontar del sole, sarà l’appuntamento che uniti ci terrà”. Cumò e saveve parcè.
Saressial tornât pardabon a cirîle?
– Po, cuietiti – le veve ridude la sô amie.
E invezit dopo cincuante agns chel disc al sune ancjemò a ogni aniversari; al sgrasaie un pôc tal vecjo zirediscs, ma istès, ta chê dade di timp, il sofà al devente muret in face al mâr e la lampade dal tinel une lune sflandorose dome par lôr doi.

di Maghe Olstrele (Rosute Pelote)
#1348

2 comments