CorseCurteLui#13 – Sot aghe

#13 – Sot aghe

O vuei contâ chel che al è sucedût al lûc dulà che o soi a stâ di vincjevot agns cun la mê famee e che mi à colpît une vore.
La citât si clame “La Plata”, e je la capitâl de province di Buenos Aires. Une citât pensade, planificade, proietade e tirade fûr ae fin dal secul Disenûf. Une citât ispirade al romanç di Jules Verne, “I cinccent milions de la Begun”, cun stradis numeradis, cun parcs e boscs grancj, cun placis ogni sîs stradis. E fo ancje la prime cun iluminazion in dute la Americhe dal Sud e cun servizi di tram eletric.
I prins abitants a forin legjons di lavoradôrs cun mistîrs diferencj.
Emigrants  talians, spagnûi, francês, austriacs che a àn lavorât ae costruzion di diviers edificis pe aministrazion publiche dal guvier tant che ospedâi, teatris, universitâts, scuelis, glesiis e vie indenant.
Ma la gnot jenfri dal 2 e 3 di Avrîl dal 2013 è je vignude jù cetante ploie che e à causionât une grande inondazion in cheste bielissime citât. Une sglavinade torenziâl cun plui di 400 milimetris di aghe in dome 4 oris. Cuartîrs sot aghe, un metri e mieç e ancje doi, la int parsore i tets des cjasis domandant jutoris, un grum di machinis che vongolavin, ancjetancj cjans e gjats a nadavin cun disperazion par salvâsi.
E je stade une tragjedie che e à causât un grum di vitimis sfoladis, plui di doi mil, e cetantis pierditis economichis, ma la piu grave e je stade la pierdite di tantis vitis umanis. Si dîs che a son otantenûf.
Aben che la aghe che e veve plovût e je stade la cause principâl de grande inondazion, il moviment naturâl de aghe viers il gran flum Rio de la Plata al ven taponât di tancj ostacui e che al à fat cressi il nivel dai riui de citât.

di Cristina Degli Uomini (Lune Platade)
#1322

4 comments