CC26Novembar#09 – Internascional

#09 – Internescional

Intai agns ’70, soredut daspò l’an dal taramot, ancje a Udin si scoltave simpri mancul la Radio Rai e si gjoldeve dai programs locâi, soredut par sielzi vie telefon i tocs di musiche e magari zontâ cualchi dediche.
La lenghe doprade al jere il talian, dome dal ’80 e sarès partide une “onde” furlane, ma une piçule stazion e veve pensât di fevelâ par furlan cu la braùre di jessi internazionâl. Nissun si ricuarde plui di jê, ma Radio Efe “Internescional” (e lu scrivìn a pueste come che e si diseve al timp) e si clamave cussì propit parcè che e doprave plui lenghis, ven a stâi il furlan.
Cuant che nus àn proponût di tignî une rubriche o jerin cjocs di felicitât, jo e R., dopo vê passât agns a imparâ acuardis di ghitare e mandadis a memorie dutis lis cjançons dai cjantautôrs cussì nomenâts “impegnâts”, o varessin podût trasmeti ce che a nus plaseve intune trasmission radiofoniche. Decidude la sigle, “Cjantautôr” cence dubi, fate la scjalute cui altris tocs – che in chê volte a duravin plui dal dopli di chei di cumò – e lis presentazions. Nissun al varès vût di fevelà intant che levin vie pe radio lis cjançons, cussì a cjase a varessin podût regjistrâ, come che o fasevin ancje nô. Par lis musichis cualchi disc in prestit e cualchi cassete regjistrade in cjase, tescj seris e vie in Baldassarie par regjistrâ intun vêr studi cul veri tal mieç e lis scufis. Alc però nol funzionave. Masse seriôs, polsis  lungjis e cualchi intop tal fevelâ. Nus à salvât l’element feminin. M. e veve bielzà esperience di radio libare in Cjargne e, oltri a fânus digjerî cualchi autôr plui lizêr, nus stiçave a jessi plui gustôs e simpatics. No sin deventâts famôs, ma si sin divertîts une vore.
Cemût ise finide? Che daspò di un pâr di agns o sin partîts pes Universitâts e vin smenteade la nestre trasmission.  Juste ogni tant e salte fûr une cassete di cualchi scjatulon in cantine e, scoltantle cuntun vecjo regjistradôr che par miracul al funzione ancjemò, o fasìn fente di jessi ancjemò zovins e cence pinsîrs come in chê volte.

Materie: Musiche
di …
#1973