CC26Novembre#08 – Lis graciis di Vigji

#08 – Lis Graciis di Vigjut

Ven a stâi che Vigjut al jere un tic fûr cu la cassele e si vantave di vêlu grant e lunc, tant che un madrac plen di morbin.
Al jere vedran, za indenant cui agns, ma cu la voie di fâ il gjal ancjemò ben impiade.
E al veve un vizi che dut il paîs al cognosseve ben.
Cuant che al olmave cualchi femine tai cjamps, al cjatave simpri une scuse par mostrâi lis sôs graciis.

«Cjalait ca ce che o ai», i diseve.  E une volte, e dôs, fintremai che la Menie e la Tine e àn decidût di fâi un biel scherç.
«Vigjut, tu tu contis simpri di vêlu grant e lunc, ma nô no ti crodìn mighe, vê!»
«No mi crodêso? Inalore us lu fâs viodi cumò».
Vigjut, che nol spietave altri, si è gjavât lis braghessis e lis à poiadis suntun ramaç.
Dut braurôs, si è metût in mostre.
Ma intant che lui al faseve il gjal, la Menie e à cjapât lis braghessis e vie di corse.
«Lis mês braghessis! Tornait culì, frutaçatis!»
Ma lôr e jerin za lontanis, che no stavin te piel a sun di ridi.

E Vigjut?
Al veve scugnût tornâ a cjase come che sô mari lu veve fat.
Di chê volte, lis veve lassadis in pâs.
Ma e jere rivade la fieste dal paîs.
La Menie e la Tine lu vevin viodût sentât dongje de ostarie.
«Vigjut, no tu nus mostris plui nuie?» i domandarin.
Pontât tal so onôr, i rispuindè:
«Spietait dome un moment. Us fâs viodi jo ce che al è un om!»
E al jere sparît daûr de ostarie.

Tal banc dal becjâr, Vigjut al veve comprât un salam di chei grancj e daspò lu veve platât jenfri lis gjambis. «Ve mo ca. Veviso mai viodût une robe dal gjenar?»
Dut braurôs, si jere metudis lis mans sui flancs.
«E cumò crodêso a ce che us conti?»
Ma propit in chel moment, il cjan dal becjâr al veve sintût un bon odôr.
Intun salt al cjapà il salam cui dincj e vie di corse, content come une Pasche.
«Noooo… Fermait chel cjan. Fermaitlu!»
Vigjut al corevedaûr dal cjan, cu lis braghessis che i colavin jù, intant che dut il paîs al sclopave dal ridi.

La Tine i berlave: «Vigjut! O savevin che tu vevis la lenghe lungje… ma no che tu la tignissis intes braghessis».

Materie: Furlan
di…
#1971