CC26Novembar#07 – Il sumitieri: un centri di agregazion pai muarz e pai vîfs

#07 – Il sumitieri: un centri di agregazion pai muarz e pai vîfs

La storie, studiant il passât, nus jude ancje a capî il presint.
E je vere che in dì di vuê la societât furlane e je avonde secolarizade e alore, dopo vê tant studiât, mi plasarès sclarîmi  ze che al reste di religjôs te vite dai furlans.
Par scomenzâ, chescj dîs chi, mi è vignude la idee di riflêti sul sumiteri e mi soi domandade parzè che ancjemò tante int e va a cjatâ i siei muarz, e ten in ordin lis tombis, e puarte rosis e lumins. Soi avonde sigure che plui di cualchidun nol va  a messe di un biel piez e dal sigûr tancj di lôr a àn dubis su la risurezion de cjar e la vite eterne, veretât di fede che e ten sù dutis lis pratichis religjosis cristianis. I antîcs aquileiês, cuant che a disevin il Credo, par dâ plui fuarze a lis ultimis peraulis dal simbul apostolic, tramandât dal teolic Rufino, si tocjavin cu la man il zerneli, come par dî: jo, propit jo in cjar e vues. ZE FUARZ!
Sedi come che e sedi, la dibisugne di sintîsi ancjemò peâz in cualchi maniere a chei che a nus àn lassaz, e je une necessitât da l’om, pararès, se in dutis lis culturis si cjatin fiestis dedicadis ai muarz e al lôr ricuart. Da sigûr il cristianisim al à dat a la muart un significât gnûf che a nol à nuie a ze fâ cu la reincjarnazion des antighis religjons indianis, che a  van tant di mode ore prisint, o cu la sperance vueide di chês plui gnovis di slontanâ chel dì nefast fasint dietis, gjinastichis di ogni tipo e plastichis, o pûr di fâsi viodi senze pôre e sberfeâ la muart cun travestimenz macabros che a plasin tant ai zovins, puarez!
Chi a si trate di capî che la muart e je une robe serie e di no vê pôre dai muarz.
Mi plasin tant chês feminis di une zerte etât che a van spes in sumiteri cuntune ande sclete, senze peraulis a saludin chei che a lis spietin in paradîs, a pene une ombre su la muse, a si fermin vulintîr a fevelâ un moment cun cognossintis par contâ o scoltâ di cualchi magagne, dîsintsi une peraule di cunfuart o, se al covente, fâ une  ridade e magari cjapâ sù cualchi petez. Po dopo a van di corse a cjase a fâ di gustâ.
Ben, no us somejal ancje a vualtris che alc di sostanziôs al sedi restât di ze che al à puartât San Marc e che a nus àn tramandât i nestris vons, cun chest biel esempli di comunion dai sanz mitude in pratiche senze tantis menadis?

Materie: Storie
di …
#1970