CorseCurte24 – Domandis e Rispuestis

Mi plasarès tant partecipâ, ma no soi sigûr di rivâ a scrivi ogni mês une conte…
E ce probleme isal? Ta chel mês no tu scrivis nuie e tu cjapis zero ponts, amen. O pûr tu scrivis une fufigne di cualchi rie, tant pe presince, e cuissà, magari ultin no tu rivis e si cjape cualchi pont istès… E visiti che il prin mês che no tu cumbinis tu âs ancje il bonus “NO CUMBINI”. In sumis, al è propit biel jessi ancje cuant che un mês no si è ispirâts o no si à timp.

A mi mi va di partecipâ, ma no ai tante voie di impegnâmi, puedio istès?
Ma cjale… o disarès ancjemò miôr. Tal sens che al è biel vê ancje cui che al partecipe cence spirt competitîf, juste pal gust di scrivi alc par furlan, fossial ancje cualchi rie mâl bastide, o magari dome par imparâ o sburtâsi a scrivi, cence fâsi cjapâ de sflacje. In sumis… sì!

E se il teme propi propi no mi plâs? O no mi ven nuie tal cjâf?
Al pues ancje sucedi. No sul teme gjenerâl, che al è vast, ma magari su la declinazion che ti ven assegnade. Bon… par dôs voltis dilunc dal an tu puedis doprâ il bonus “CAMBIE!” e par il rest, la creativitât e je dal sigûr plui stiçade di un teme dificil, che di un facil.

Aio di sielzi par scugnî un non di un cjaval?
Sì, parcè che al fâs par dal divertiment, ma ten cont che i nons di cjavai di corse a son infinîts, ven a stâi che al va ben dut. E po, une robe spiritose, simpatiche o di bataie e fasarà la CorseCurte ancjemò plui divertente. Ma no stâ a bacilâ masse eh…

No ai capît ben cemût che si vote lis contis se no mi nteresse di scrivi, ma di lei?
Facil. Cuant che a son findis lis publicazions al vignarâ publicât un articul cu la liste di dutis lis contis dal mês. Baste scrivi un coment disint cuâl mus che tu votis e, se tu âs voie di partecipâ ancje al FantaCorseCurte24, firmâti.

Ma par votâ si saial cui che al à scrit la conte?
Fin ae publicazion de classifiche, no si sa. Dopo dai 16 o metarìn i nons dai concorints, cussì cui che al vote (e al scomet) lu fâs su la conte e no su la scuadre.

No ai capît ben ce che al è il FantaCorseCurte?
Cuant che un al vote lis contis e al sielç chê che i plâs di plui, in pratiche al scomet su la conte, e in efiets o sin intune corse di mus, si che, al cjaparà ancje lui i ponts che e cjape chê conte. Baste comentâ simpri cun chel non e ve li, che o varìn la classifiche dal … il FantaCorseCurte!

Aio di scugnî disvelâ il gno non, timp o tart?
Nuuu. Il non al à di jessi dât dome al Ostîr inte mail de iscrizion, insieme cun non dal mus. Daspò, se propite tu sês un terorist o un antifa che ti sta cirint la Interpol o la Digos, alore no covente dîlu.

E se si iscrivin in tancj e e salte fûr une sdrume di contis di lei?
Magari! Sarès bielonon! E nol sarès nissun fastidi… Lis contis a son curtissims, plui curtis di une pagjine, e la nestre zurie si rangje

Ma se soi un partecipant, ma o ai gust di jessi ancje un letôr e partecipâ al FantaCorsecurte, puedio?
Nol è che tu puedis, al sarès propite biel che cui che al scrîf al leies e votàs ancje lis contis di chei altris mus.

2 comments