Fra lis pagjinis e i Sants

A tacâ di sabide cheste, ai 17 di Otubar, aes 13.42 su RaiPlaySound, li dal podcast Conte che ti conti, a jessin 4 puntadis di un podcast metût adun de nestre Coghe, inte suaze dai events che a fevelin dal San Simon, che a contin alc di plui di 4 autôrs dai Premis di une volte. Il prin autôr che si fevele di lui al è nuie mancul che il nestri Ostîr si pierdin in cjacaris… us zontìn chi sot la locandine e subit daûr ce che nus conte la Coghe sul podcast. Buine scolte!

Su Radio Rai FVJ e torne la trasmissiondedicade al premi San Simon

No si pues fevelâ di leterature furlane cence ricuardâ il premi San Simon, il plui impuartant ricognossiment pe scriture te nestre lenghe, nassûtintal 1979 par volontât dal Comun di Codroip e intitulât ae figure dal inzegnîr Agnul Di Spere (Angelo Pittana). “Tra lis pagjinis e i Sants. Storiis e autôrs dal premi San Simon”, e je une trasmission radiofoniche pe Rai dal Friûl Vignesie Julie ideade de Societât Filologjiche Furlane, cu lis vôs di Serena Fogolini e Walter Tomada e cun leturis di Massimo Somaglino e lis musichis di Vittorio Vella, che e larà in onde intes setemanis prime de cerimonie di premiazion de ultime edizion dal San Simon, che si fasarà ai 28 di Otubar. Vie pes pontadis, trasmetudis la sabide, cun orari 13.42, i scoltadôrs a podaran cognossi cualchidun dai vincidôrs, intun percors indaûr intal timp ae scuvierte di personaçs e curiositâts platâts intes pagjinis de storie di chest premi leterari. Daspò dai apontaments des edizions passadis, dedicâts a Alan Brusini, pre Antoni Beline, Franco Marchetta, Gianluca Franco, Ovidio Colussi, Giovanni Morsan, Tarcisio Mizzau e Laurin Zuan Nardin, la prime pontade di chest an (17 di Otubar) e menarà i scoltadôrs ae scuvierte des oparis fûr dal vade di Raffaele Serafini (Soreli jevât a mont, Contis sot spirt, Bisest, Cryptofriûl). Po dopo, e sarà la volte des tradizions e des liendis de Cjargne, cun Renzo Balzan (ai 24 di Otubar). No mancjaran i omaçs a Roberto Ongaro (31 di Otubar), che nus à lassâts a Avrîl di chest an, e a Gianni Gregoricchio (7 di Novembar), che intal 2027 a colin i cent agns de nassite e i vincj agns de muart. Dutis lis pontadis di “Tra lis pagjinis e i Sants” si podaran tornâ a scoltâ su RaiPlay sound, te suaze dal podcast “Conte che ti conti”.