Il segret de montagne

Tomâs al jere un frut pluitost sierât e solitari.

Cun so pari lis robis no levin tant ben, il gjenitôr al pretindeve che il frut al fasès chest e che al disès chest altri, forsit dutis robis che il stes pari nol veve podût fâlis inte sô zoventût. E a scuele cualchi bulo plui grant di lui lu coionave cjolintlu in zîr.

Par chest e par chel, Tomâs, cuant che al jessive di scuele, i plaseve lâ a cjaminâ pai trois di chês montagnis che a circondavin il so paisut.

Une buinore, dulinvie la cjaminade, si cjatà devant di une parêt cretose e cence pensâ, come gjavantsi di dues cualchi pene, al berlà il so non:
– Tomâs!

Il rivoc tornant come une sclopetade lu maraveà.

Il frut al riduçà e fasint un pas a man çampe al tornà a provâ cuntune altre peraule:
– Mame!

Cheste volte il rivoc al rivà prin che il precedent al finedi, Tomâs intrigât al le a man drete montant suntun cret provant cun altris peraulis.

Cumò la rispueste e fo inmò plui clare e fuarte, cuasi scherçose, come se la montagne i rispuindès cun energjie rinovade.

In ogni gnove intervenzion, dut al cambiave.

Al sierà i voi sintint che lis vôs lu involuçavin. I pareve di sei sore une gjostre, i rivocs si dopleavin, come se lis montagnis a vessin diferents mûts par fevelâi.

E intant che il soreli al leve a mont daûr des cimis, Tomâs si sintive feliç di vê cjatât un mût sempliç e magjic di sintîsi in compagnie.

Il rivoc al jere il so segret platât te montagne.

di Galliano di Buenos Aires
#1896

1 comment