CDC06 – Ratatuie

CDC06 – Ratatuie

— Stude la pile rincoionît! Âstu voie che nus viodi? Cui sêstu?
— Che al scusi, ispetôr! E je la prime volte che o voi in mission! Mi clami Morandin. Il cjapitani mi à dit che al coventave un om di rinfuarç e al à mandât me. Mi à parfin dât une pistole. Biele e lustre! Vele…
— Ten jù la cane, insemenît! Stâ ben a sintî. O vin di rivâ fin parsore chel solâr. Al è il côf di Ratatuie, il famôs lari di diamants. Lu cjaparìn cu lis mans tal sac. O vin di stâ atents! Viôt di no vuastâ la mission!
— Capît dut, ispetôr! Jo o lavori dome in ufici, ma mi visi ben dal gno adestrament. Caserme Rossetti di Triest, vie pal mês di Avost, cjalt di murî, il tenent che mi vosave tes orelis, jo o tremavi come…
— Ssstt! Tâs cumò! Tu mi contarâs une altre volte! Stâ concentrât e viôt di no fâ capelis. Viodistu chê lusute? Di sigûr Ratatuie al è dentri. E cun lui ancje la casselute cui diamants. Le à robade chê altre dì. Valôr dusinte mil euros.
Il zovin al mole une sivilade di sorprese.
— Ce sivilistu, indurmidît! Ven daûr di me. No stâ fâ casin e ten jù la cane de pistole. Nol veve un plui scaltri di mandâmi il cjapitani?

I doi poliziots a van su pe scjale di len. Il scûr de gnot ju ten platâts de visuâl dal lari, guai mai al ves di svoglâ pe barconete dal solâr. In curt a rivin sul puiûl, denant de jentrade. Si fasin di moto l’un cun chel altri. L’ispetôr al mole une pidade secje te sieradure, sledrosant la puarte. Subit al ponte la pistole tal vueit, vosant.
— Fer Ratatuie! Ten lis mans ben par aiar!

Ma dentri nol è nissun. Un strani odôr di musar al parone la stanzie. Morandin al pie la lûs. Un davoi. Dificil intivâ il colôr dai mûrs e la tinte dal breâr. Robe par dut: picjade, ingrumade, berdeade. Tocs di fier, tubis, scjatis. Une cuarde e ten strents lens e raclis. Cjadreis intassadis, butiliis vueidis, rotis, sclesadis. Tal cjanton un motôr rusin. Cjartis peadis cul spali, cartons, martiei e imprescj di ogni fatece. Parfin une scove che intun ambient dal gjenar e somee propit sconsolade. In bande si viôt une casselute di viludine. I diamants!
— Lasse Morandin. O pensi jo…
Ma nol finìs di cjacarà. Un ton al savolte la stanzie. Fum e puce di solfar. Brusôr tai voi e tal nâs. Juste il timp di rivâ sul puiûl e colâ par tiere.

Sirenis. E rive la ambulance e dôs machinis dai carabinîrs. Cualchidun al compagne pes scjalis l’ispetôr che al sbolsee. Al fâs segns cu la man.
— Cjapitani! Dentri al è ancjemò Morandin! Tiraitlu fûr, prin che al muri intosseât!
— Nol è nissun dentri, ispetôr. — Al dîs il cjapitani. Po dopo plui rabiôs. — Anzit. Une operazion cussì fate bessôl, cence un rinfuarç…
— Mi à pûr mandât Morandin? Un zovin poliziot. Al è dentri!
— Impussibil! Nissun mi à clamât par un rinfuarç. Cun di plui… No cognòs nissun Morandin!
L’ispetôr si russe la muse, come par sveâsi di un brut sium.
— Ma cemût? Jo mi visi ben di ve cjacarât cuntun zovin poliziot. Po dopo une iluminazion. — Provait a cirì te marcjanzie di sore. Viodêt se o cjatais tal casin une divise di poliziot.
Nol covente dîlu dôs voltis. Ve un carabinîr che al puarte fûr dal solâr une gjachete nere picjade suntun len. L’ispetôr cuntune cuarte di bocje.
— Morandin… O miôr… Ratatuie!

di Lima (Massim Furlan) – peraule clâf: Ratatuie
#1893

4 comments