CDC01 – Cudui

CDC01 – Cudui

I cudui no mi plasin.
No crôt che al sedi cualchidun che i plasin i cudui, clare. I cudui a fasin ingomut a ducj. Ma tal gno câs nol è chel. I cudui, a mi, mi fasin pôre.
E chest, parcè che jo ju cjali, simpri, cun atenzion, ogni dì.
Ju cjali di dongje.

No che al sedi dificil, stâ atents ai cudui… anzit, il dificil al è fâ fente che a no sedin, che a no esistin, o adiriture, come che dutcâs a fasin tancj, che a no sedin cudui, ma che a sedin alc altri. No sai ce, no steit a domandâmi a mi. Us ai za dit, che jo o viôt benon che a son cudui e che mi fasin pôre.

Ju cjali che a corin sù e jù, che si movin plui svelts, che a son simpri di plui e simpri plui ferbints e sigûrs, parons, cence fastidis.
Us disarai di plui… mi soi inacuart che ancje se a dâi une voglade svelte no tu i fasaressis câs, a son ducj diferents, di aspiet. E diferent al è ancje il lôr compuartament. Ve li un che al vose e al berle cun ducj e al peste lis çatis; ve là un altri cidin cidin, distirât tal mieç de cjar che a fraidìs; ve ancjemò un che al pâr ninin e educât, che si môf cun rispiet e delicatece… E dopo a son chei che a stan platâts, intes lôr tanis di patoc, e tu viodis dome lis çatutis che si slungjin par robâ alc. Altris ancjemò si cjapin da dî, un cul altri.

Ma a son simpri cudui. Ducj.
Al sarès di liberâsi di lôr, lu sai. Al è ce che a pensi di simpri.
E pûr no si rive, vûstu parcè che a son masse, vûstu parcè che cudui a clamin cudui, vûstu parcè che si difindin fra di lôr… e vûstu, tocje dîlu, parcè che al pâr che a cualchidun, i fasin comut, i cudui.
Sì, lu sai ce che al dîs il sintiment, la logjiche, il bon sens… Se a son vignûts i cudui, al è parcè che al è un cadavar, un muart, un alc che al fraidìs.
Ma mighe simpri, us dîs jo. Par gno cont al pues sucedi ancje che i cudui a vegnin suntun cuarp che nol è ancjemò muart.

Ma sedi ce che al sedi, la sostance no cambie: il mont al è plen di cudui.
Tu puedis cjalâ di ogni bande e tu ju viodis. De Palestine ae Russie, de Americhe ae Argjentine, de Polonie al Iran, de Cine ae Coree… Al baste poiâ il dêt suntun planisferi e tu lu brinchis.
Bielorussie… cudul! Gabon… cudul! Nicaragua… cudul! Turchie… cudul! Burkina Faso… cudul! Venezuela… cudul! Afghanistan… cudul! Italie… cudui! Eh, sì. Magari plui picinins, ma a son ancje ca di no, no ûtu! E i cuduluts a son ancje plui pericolôs, propite parcè che a son picininis e a muardin un pôc par volte, cence dâ tal voli.

E o torni a ripeti: lu sai, al sarès di liberâsi di lôr.
Il fat al è che ogni volte che mi cjali ator, che o cjali ducj chei che a no son cudui, o viôt sì, che a son vîfs e che chest mont a nol è muart, ma no soi masse sigûr che nol sedi daûr a fraidî.

di Vimodrone
#1888

2 comments