LCPBDM #7.2 – Di bessôl te fumate

Lâ a fâ une cjaminade pai cjamps.
Lâ a fâ une cjaminade pai cjamps, ancje se ca di une ore al ven scûr.
Lâ a fâ une cjaminade pai cjamps, di bessôl.
Ancje se o sin a Nadâl e se ti viodin a ti cjapin dal sigûr par mat.
La int e à tal cjâf cheste robe e no tu je gjavis.
La int no capìs ce che al vûl dî passâ dal timp di bessôi, sielzisal, gjoldisal, straçâlu cence vê di rindi di cont a di nissun.
E a ti, se je une robe che ti dûl, e je che chel timp tu rivis adore a gjavâtal vie dome dongje des fiestis di Nadâl.
E alore cussì tu fasis: tu ti metis une tute vecje e un pâr di scarpatis e tu vâs a fâti la tô cjaminade pai cjamps, dongje cjase, cence un percors stabilît e une regule.

Al è dai timps dal covid, che no tu vâs ator pai cjamps dongje cjase, e tu ti domandis cemût che tu âs fat a fâ di mancul par cussì tant.
Cjaminâ pal arât e pai fossâi, pai trois che cumò a son cence fueis e framieç dai morârs, che intant che e ven jù la fumate, a parin scjassâ lis mans come fantasimis che ti saludin.
A ti ti plâs la plane, il Friûl di mieç, il fîl de schene dal mont che si plee sot dal soreli che al va a platâsi daûr des cumieris. E je une pâs che no si pues descrivi, e la fumate che si poie a planc dapardut al è un di plui.

Then one foggy Christmas Eve… Jonathan Bloy

Tu impiis la musiche tes orelis, tu sielzis un disc gnûf che ti pâr interessant e tu sielzis une cjançon dulà che tu leis il non di un cjantant che tu cognossis, e che ti plâs la vôs. Cetant che tu ju scoltavis, chescj ca, di fantat. Dopo tu ju âs pierdûts di orele e tu ti domandis, parsore dal rumôr di scartòs e pocis glaçadis, tropis altri robis che si piert, cence inacuarzisi, pûr vint a disposizion internet e i imprescj de rêt, par stâi daûr a dut. O forsit al propit par chel che si piert lis robis, parcè che al sarès facil cjatâlis. E intant che i tiei pas a talpassin la fumate, ti ven voie di lâ a cirî une cjante di chês vecjis, un alc che tu âs pierdût, ma no tu le cumbinis. Di noi, si clame la cjançon che tu stâs scoltant, e si vierç come un mâr scuindût, parant vie la fumate cui siei sunôrs.

Se no je chê li, la cjante plui biele dal mont, no tu sâs cuale che e je.

DI NOI, Luca Bergia, Luca Guzzetti, Samuel, Nuovi colori [2025] 3’46”