LCPBDM #4.1 – Deejay

La prime dî di lavôr no tu eris cussì sustât.
Ma chê sere li e je ben plui dificile de prime dì di vore. Da rest, ancje se chel li nol è e nol sarà il to lavôr, a ti pain. No masse, ma nancje masse pôc. E pôc al cambie se a àn scrit su la locandine che tu sês un deejay, che secont te nol è mica just. Tu tu sielzis, no tu cambiis. Al limit tu scurtis e tu slungjis i tocs, tu messedis alc, ma simpri par pôcs seconts e simpri – cheste e je une tô leç interiôr – cence mai gjavâ vie la nature da lis cjançons.

E sielzi la musiche, tu sês convint, e je une art, une cualitât che si impare, sigure, ma cualchi volte si le à tal sanc. E tu tu crodis che al sedi cussì, par te. Tu sês simpri stât bon, tes fiestis de tô crew, di meti playlist che mai nissun si è lamentât e anzit, plui di cualchi volte a son vignûts a domandâti ce che tu vevis metût sù o pûr tu ju viodevis torzeonâ il telefonut par aiar par shazammâ la cjante.

A son chestis lis sodisfazions. Cjalâ la int, viodi cemût che si môf, ce che e bêf, cemût che si viest e intivâ il mood, jentrâ tai lôr cjâfs e soredut tes lôr orelis. Chest tu sês simpri stât brâf a fâ. E cumò che tu sês rivât intun locâl di chei vonde grancj, dulà che no tu cognossarâs la int, dulà che si bale, dulà che a saran in tancj a lâ denantdaûr dal to Mac… tu âs pôre di no imbrucjâ la cjante juste, il toc par vierzi, par jevâ sù il volum e viodi che cuasi ducj a tachin a movisi, a fâ sù e jù cul cjâf.

E tu ciris, tu ciris, tu ciris. Tu âs za il to storic, ma tu âs voie di cjatâ alc di gnûf, par chê ocasion… e ve li, ae fin tu lu cjatis, il toc just, par fâju movi ducj. Il plui biel dal mont.

STYLE & FASHION, Pa Salieu (feat. Obongjavar), Afrikan Rebel [2021] 4’26”

La cjançon plui juste dal mont, chê che e je buine par tacâ un dj set e fâ movi il cjâf a ducj, e je di un inglês che si clame Pa Salieu, ma che al à divignince dal Gambia. Al è un rapper, ma avonde atipic, stant che dentri dai tocs al met une vore di Afriche, e al messede ancje altri, stant che al à un background di folk in famee. Al à jessude musiche gnove ancje chest an, tal 2025, daspò di jessi saltât fûr di galere par vê protestât un pôc masse cul popul, ma ancje se al è vonde zovin, al è un che al va avonde par so cont, cence cori daûr ai sunôrs che a van di mode. Il toc che o vin sintût al ven di un EP dal 2021, Afrika Rebel, e che za a sintî come che lui al dîs “fashion” al vâl la scolte, si clame “Style & Fashion” o come che al dîs Pa Salieu, Styla fascià.