AD/HD

I’ve got the spirit
But lose the feeling
Joy Division

O soi daûr a sunâ la ghitare, propit tal mieç di Attention, il toc plui potent che o vin, e mi ven tal cjâf che al sarès propit figo dissegnâ un che al sune la mê ghitare parsore de mê ghitare e vie cussì. Cemût si clamial l’efiet? No mal visi… Ma al jere une biele peraule, podarès doprâle come titul par une cjançon! Ma il dissen… O tachi a pensâ ai colôrs. E dopo al è di viodi cemût tirâ sù i bêçs par fâ la vore. Ma mierde! O ai falât un pâr di notis, forsit cualchidune di plui. Ma tornant ai colôrs… sielzarès i complementârs. Cuâi sono? Vert-ros, viole-zâl, e dopo? Ancjemò doi… Ve ca, crevadis altris notis, juste tal ritornel. No si inacuarç nissun, a di part de bassiste, che mi cjale di brut; e dal cantant, che al mole un porco lontan dal mic; e dal batarist, clare, che
Ahia!
Mi à tirât une bachete te schene, cence fermâ di sunâ. Ben fate, bulo, o vin un batarist pardabon bulo. Dut câs, la int e je contente istès. Da rest, o sin i AD/HD, mighe un cualsisei complès di metalârs malbastîts! Ancje se il non al fâs pensâ a une cover band. Ma noaltris o sunìn cuasi dome tocs nestris, e o pestìn come mats. Metal e Devast, al è dut un Imbast. Nol è il nestri mot, lu ai pensât cumò. Biel, dai… Ah. Finide la cjante. Ve ca. One, two, one two three four… o tachi a sunâ Deficit, un punketon galatic che ti scrodee ancje i budiei. Lu ai scrit jo, come ducj chei altris. Si podarès doprâ il riff, magari cambiant un pâr di notis, e meti dongje une altre cjante, magari un valzerock, no ma ce! Un valzerpunk! Cuissà se a esistin za? E come titul?
Ahia!
Mierde. O ai pierdût il bridge e mi è rivade te schene une altre bachete. E nie… il batarist, in bande che bulo, al à ancje smicje. Ve parcè che al vinç simpri a freçutis… Ma… varano lis freçutis tal chest locâl? Boh. Il valzer punk. Une robe iperveloce. Zumpapà, zumpapà, ma iper svelt. Orpo, ve che mi è sbrissât il pletri pete che
Ahia!
Chest colp e je la bassiste. Mi à molade une pocade! Eh, e à reson. Ma cjale la int! I à plasût! Vin di fâlu simpri! Podaressin fâ dut un toc che o sunìn e si pochìn! Porcocan! Magari propit il valzerpunk ipersvelt. Pogo sunât. O fasìn nô la ativitât tal puest de int. Figade! Podarès intitulâlu Hyper. No. Cuissà trops tocs che… Hyperactivity! Perfet. Dopo voi su Google a viodi se… Anzit… pete. Finide la cjante. Puartade a cjase, dai. Prin dal tierç toc il cjantant al presente la band. Siamo gli AD/HD e blablabla… Podarès profitâ par tirâ fûr il telefonut e
Ahia!
E nie. La bachete mi à rivade te codope. Lu met vie. Altri toc. Cheste e je une cover. Une des pocjis. Joy Division. Ma ce ajal di cjalâmi il cjantant? Ah, sì, o ai di cambiâ ghitare. Se voi indenant cussì… One two… one two three four… Vie cun Disorder.
Di ben che o san cemût che o soi fat, va, che se anìn indenant cussì al va a finîle che… a finissin lis bachetis! Ah, ma a proposit di bachetis… pensavi…

di Michêl Londar
#1849

Notis: par capî miôr la conte…

2 comments