Îr l’altri, cjatantmi tal jet cu la fiere, o provavi des straniis sensazions.
Cuant che mi tocjavi la muse mi imagjinavi di viodile ai rais X ma come se e fos chê di une altre persone.
O sintivi intes orelis un rumôr continui come di aghe o di aiarin di fûr.
Acufene?
Se o impiavi la lûs mi sameave plui clare dal normâl. L’odôr dal zessalmin che al vignive dal di fûr, mi sameave plui fastidiôs dal solit e dopo e jere chê stelute celestine comparide intal scûr de mê cjamare, lontanone. Sfantade intun marilamp: o varai vût lis tarlupulis.
E îr di matine e je tornade chê stele. E à durât cualchi istant di plui, tal scûr de mê stanzie.
O ai di vê cjapât alc lant tal palût cun chel cjalt. O ai fat la bulade di lavâmi cu la aghe frede, une volte tornât a cjase, e di no suiâmi il cjâf e di metimi tal scûr de mê cjamare une vore frescje. O soi passât masse a la svelte dal cjaldon al frêt. Al sarà par chel.
Vie pe sere la mê imagjine devant dal spieli e veve come un alon: un alon celestin.
La stele no si è fate plui viodi. Vie pe gnot no ai durmît nie. O vevi la bocje amare.
Vuê di matine o ai sintût lis sirenis des ambulancis. Al è passât ancje un camion plen di militârs. Un di lôr al berlave cul megafon e al diseve che a vevin metût in vore la leç marziâl e che no si podeve plui lâ fûr di cjase.
La mê piel e je deventade blu. Al è capitât tal dopomisdì. O ai capît che la stele e je jentrade dentri di me e mi à trasformât. O ai di vê tirât sù alc ta chel palût.
Ma alore a jerin veris dutis chês liendis!
A contavin i vielis di plui di un che al jere tornât di chel puest ma nol jere compagn di prime. E dopo al jere disparît. Sfantât par simpri. O pensavi a vecjis superstizions ma invezit e à di jessi une base di veretât.
Vele! E je une grande lûs celeste difûr, cumò cumò. Mi spiete. Lu sai. O voi tal bearç. O sai che mi puartarà vie. No sai dulà e no mi interesse.
La mê vite dome cumò e à un sens.
di Checo Tam
#1845
