Cuant che o mangji un pagnut fresc cun dentri il bon salam di cjase e o bêf un taiut di neri mi ven simpri iniment puar gno pari. Parcè mai?
Al jere il nestri rît viers mieze matine, cetancj agns indaûr, cuant che o lavoravin te buteghe di alimentârs. O fasevin simpri une polse e jo o levi a comprâ il pan li dal pancôr; gno pari al taiave il salam che o vendevin nô; po al leve a cjoli une guantiere cun doi tais tal bar dongje che al jere juste tacât a la buteghe: e jere parfin une puarte comunicant. Une volte, tai agns ’30 e fin ai agns ’50, o stimi, al jere un paron unic pes dôs ativitâts. Di fûr, par tancj agns, e à resistût la scrite di une volte, COLONIALI, LIQUORI, VINI E GRANAGLIE, pûr trop cumò scancelade.
Insome, cul vin di Pauli ustîr, il salam e il pan, cun chel profum e chei bogns savôrs la nestre matine e jere santificade.
E jo e il papà des voltis o barufavin come il cjan e il gjat ma dopo o fasevin simpri la pâs. Al jere scjaldinôs l’om. Come chê volte che si jere ostinât a doprâ un polvar colorant vecjo dai agns ’30 che o tignivin inte buteghe: lu veve metût inte tempere blancje. Al voleve piturâ di colôr di rose une stanzie ma la prime parêt e jere vignude fûr dute a grops. I sacrabolts che si son sintûts in dute la vie sai ricuardin ancjemò! E dopo lui mi veve ordenât di lâ a cjoli altre tempere la jù di Brôs, tal magazen edîl. E vie: dut di blanc, cence plui esperiments!
E chê volte che al veve butât par erôr une cjiche no distudade intal cestelin des scovacis de buteghe? Al veve cjapât fûc: ce fumeron! Al veve butât aghe daurman. Aghe e sacraments.
Jo cumò mi cjati achì, li di Poç a Udin, cui amîs. A viodi chês scansiis altis di une volte, identichis a chês de nestre buteghe, o scugni pensâ a puar gno pari. O ai ordenât merlot, pan fresc e salam e o soi convint che cumò al è ancje lui dongje di me pûr se no lu viôt.
O pûr al è dentri di me.
Sì, di chel o ai la ciertece!
di Milio dai Cjans
#1844
