Une sflandorose zornade

Une sflandorose zornade

E jere une sflandorose zornade di soreli. O jeri une vore otimist. Chês zornadis cuant che si è une vore contents di vivi e no si à pinsîrs. Si è euforics e si à la sensazion di vivi alc di impuartant… si presee il moment. Diu, lis peraulis no rindin ben la idee di ce che o provavi, rivant cuasi a une sorte di estasi.
Ogni volte che o vierç chel album e ti amiri al parturîs une sorte di meracul. Un alc dentri di me al rive parfin a rivocâ la tô vôs, i tiei moviments…
Nô che o cjaminin ta chel grant parc cu lis vecjis statuis dal 1700 plenis di musclis e lis struturis modernis: il labirint zâl, dulà che tu jentravis, maraveantji come une frutute; la spirâl di metal, cussì grande, cun tant di puest par sintâsi: di lontan e cambiave colôr a seconde dal angul di iluminazion dal soreli; la gjostre ferme; e chê cente cui palets colorâts dulà che la jerbe e podevi cressi liberementri.
Il timp al va indevant ma la fotografie e rive a inmaniâ come un varc spazi-temporâl, clamìnlu cussì…
E jo, par un moment, o scjampi a la mê realtât solitarie e mi torni a cjatâ cun te, vierzint dome un album che al polse intune vecje librarie.

di Checo Tam
#1841