Si visais, vere, che la nestre Ostarie e veve scrit un libri? E secont voaltris une Ostarie che e je buine di scrivi un libri, vûstu che no sedi buine di scrivi un altri? E soredut, vûstu che nol il secont nol vegni ancjemò miôr?
E alore, cu la zornade di îr, ai 8 di Fevrâr 2025, e la fieste pe premiazion de CorseCurte24, le vin petade! Lu vin tignût platât fin tal ultin, e ancje se plui di cualchidun sal spietave, forsit nol sal spietave in timps cussì curts. Ma l’Ostîr al à fat une operazion degne dai servizis segrets (no, par fortune no chei talians) e doprant cualchi colaboradôr fidât al à tignût tal scûr parfin chei de clape di Contecurte. Tant al è che il libri al è stât tirât fûr de scjatule dome ae fin de serade!
Il prodot lu vês za viodût ca parsore: la gnove creature leterarie de Ostarie Contecurte. Il libri che al cjape sù, comedadis e cuinçadis, lis miôr contis de CorseCurte24. A son 77 contis in dut (numar che nus someave une vore significatîf), par 169 pagjinis, al presit popolarissim di 10euros. Lu podês cjoli su Amazon ancje cumò… ve ca il leam!
Il libri si intitule come la gare “Tu scrivarâs une conte” e al è il secont volum di chê che aromai e je une golaine. La golaine de CorseCurte. Come che o vin dit, il libri al à dentri une biele clape di autôrs, sielzûts dal Ostîr cence cjalâ in mus a di nissun. Dai 31 mus che a àn partecipât in 26 a àn rivât a meti dentri almancul une lôr conte. Stant che o vin ancjemò di spiâ la classifiche finâl, e par cumò le san dome chei (tantonons!) che a a jerin là di Pituel îr di sere, us disin dome che a son dentri lis contis di… Daûr la Lavagne, Incocalît, Nonio, Torototele, Muspilli, Derna, Secretariât, Daisy, Nevio, Fuschi, Bultrik, Ippogrifo, 32, Ombre Grise, Glorious Grene, Brene Sfolmenade, No Ancjemò, Vercingetorix, Mari de Gnot Nostrane, Gjino, Atile, Stele Alpine, Teresine la çuete, Siruc, Catine la Nere e Matungo.
Cemût diseiso? Volês che a vegnin disvelâts i nons? Ma sigure, aromai si san… vait a viodi te pagjine des classifichis, cuant che lis varin publicadis! 🙂
Ma vignin al libri, sù.
La cuvierte e je di Stiefin Stefanut, il nestri Muini, che in bande a ducj i lavôrs che al fâs al à cjatât il timp di tirâ fûr cheste cuvierte che e spache pardabon. Al Ostîr i è plasude un casin, e o sperin ancje a voaltris.
L’editing pe grafie al è di Carli Pup, zurât che puaret, dopo vê scugnût lei e votâ lis contis par un an, al scugnût… tornâ a lei dutis lis contis par corezilit. Ma al vignût fûr un prodot biel net e ben fat, ancje a nivel di lenghe e grafie.
L’editing tal comedâ cualchi conte e la part operative de selezion des contis e compobiment dal prodot editoriâl le à fate l’Ostîr, che di fat al è il curadôr de racuelte, e che us sta scrivint. E us dîs ancje che no je stade nissune fadie a tirâ fûr 77 contis che a meretassin jessi publicadis. Anzit… par i ultins 2-3 “slot” di jemplâ al veve pes mans 10 o 15 contis che podevin cence fastidi jessi tal libri. Ma al è stât sielzût ancje di proponi chest lavôr tant che un “compendi de leterature curte in di di vuê” mostrant sfumaduris e cantins dal scrivi dai furlans, sedi chei che lu fasin di mistîr, sedi chei che e je la prime volte che a scrivin contis in marilenghe. O cjatais dentri pardabon di dut, des contis plui maluseriosis e di denunzie sociâl a chês plui zuarinis, o ironichis, o di pôre, o fantasience, o par fruts… in sumis, une biele pallette di colôrs.
A nestrî parê, il libri al par dabon biel, a nivel di contignûts, ma o spietìn seneôs i vuestris coments e pinsîrs, ancje di chei che a àn fat la CorseCurte24 e magari lis contis lis àn za letis. Dal sigûr al pensarâ che “no sa lis visave cussì bielis”. E la veretât e je propite che al à reson. Lis contis di gare, scritis cun cualchi premure o sot pression, a vevin simpri cualchi piçul difiet, e al è bastât raspâ un tic la forme per vê un prodot di gale.
Se o volês cjolis il libri, come za dit, lu cjatais in internet, ma o podês ancje domandâlu al Ostîr cuant che al ven al cors di furlan li de Filologjiche che al è in vore cumò (joibe dopomisdì) o vignint a fâ un scjampon Vinars di sere al spetacul che al fâs l’Ostîr par presentâ i siei doi libris par talian, insiemi cun Alvise Nodale e presentât, di Michêl Londar, il nestri Berlon.
E soredut, cumò che il libri de CorseCurte24… Fevelait, condivideit, sparniçait!
