CC24Dicembar#18 – Vert

18 – Vert

cinîsa par coltâ prâts

Al jere miôr passa par aiar, cuntun avion, par viodi cemût che il cjamput di Libero al jere diferent di chei altris. Un stric di tiere di un biel colôr vert jenfri chei altris tocs di teren, tant strent che al someave sburtâ cui comedons.
Di fat, si ben che i colôrs dai cjamps ator a cambiassin cu lis stagjons, chel fruçon di tiere di Libero al restave simpri vert, un biel vert, fresc, cuasi lusint. Ancje di Invier, cuant che la nêf e sblancjave la campagne, velu il teren vert, che al spontave tal mieç dal blancôr come un barcon suntun mûr smamît.
Libero al tignive chel prât come un fi. E nol butave porcariis, si ben che i contadins dulintor lu sbeleassin disint che par vê une jerbe cussì verde si scuen messedà la tiere cun cualchi acolt. Ogni câs a flocavin lis ufiertis par caparâsi chel tocut di teren, dutis dineadis, tant che il puar om al jere aromai tignût come un mat fûr di cjâf.
Cualchidun al zure di vêlu viodût petenâ la jerbe cuntun ristiel che al veve costruît di pueste, o pûr cjareçâ la tiere cu lis mans e, piês ancjemò, scovâ vie la nêf tai mês di crìure. E ducj lu cjalavin di sclavueç ogni volte che al passave in biciclete cui siei imprescj sore la spale.
Lu àn cjatât muart tal mieç dal so cjamput, a braçs a larc, come che al volès cjapâ a bracecuel dute la jerbe. Tancj agns prime al jere stât liberât di chel maladet cjamp di Buchenwald. Par tant timp al veve sparniçât su la sô tiere il polvar grîs dai siei compagns, e cumò ancje lui al jere deventât cinîsa par coltâ prâts.

di Massim Furlan (Brene Sfolmenade)
#1835