CC24Dicembar#13 – Çupets

#13 – Çupets

Ma  soredut, voaltris lajù,
cun chês cjampanis adilunc e fuartis
tornàimi a dâ
la maravee de Lìule
cuntune gnot sutile di zupèz.

Un meracul! Dopo agnorums si sintin çupets e grîs a cjantâ pardut.
Dopo dut chel velen butât e jere une robe rare sintî cjantâ chês besteutis.
Lis cjampanis dal bot a sunin. Mi fasin content.
O soi chi a maraveâmi parcè che che la vite e je tornade su chescj rivâi, dongje de roie, pai cjamps e ancje intes ultimis boschetis.
Il fat al è che cumò dut il nestri Friûl al è un parc fotovoltaic grandonon e di cjamps cuasi no ‘nd è propit plui. Il contadin nol è plui tâl: al à metût la golarine e al è a vore tal cumierç. Cumò il forment, la soie, il vuardi, la blave, la siale e dut il rest a rivin dal forest.
I nestris silos a son plens ma no coltivìn nuie o cuasi.
Coltivâ nol rindeve plui nuie e alore i contadins si son lassâts convinci a vendi i cjamps a lis multinazionâls de energjie fotovoltaiche. Nie plui cjamps plens di velens ma tancj e tancj panei.
E i çupets si son moltiplicâts al inverosimil, come se a fossin une plaie bibliche. A rosein dute la jerbe che e je tai parcs fotovoltaics. E cumò a stan dispueant ancje lis ultimis boschetis.
Poben… baste tignî i grans al sigûr intai silos.
E dopo, ancje cuant che la ultime agacie e l’ultin ailant a saran sfulminâts dai çupets, nie pôre!
A stan bielzà sorzint milante palis eolichis. Lis piturin dal colôr dai arbui o ur fasin un rivestiment di vere scusse di arbul e a metin su la colone, sot de eliche, ancje dai rams fents, cun fueis di pure plastiche. Al è dut ben fissât.

Ce volêso di plui?

di Checo Tam (Derna)
#1830

1 comment