CC24Dicembar#11 – Burlaz

#11 – Burlaz

S’ingrope il cîl, si jeve un polvaron,
si sint un ton e al sclope po il burlaz,
i lens si stuàrzin ‘e zighin come maz,
e al plûf denant de puarte.

Cuant che al ven a cjatâmi miò cusin mi confesse simpri lis sôs magagnis. Lu à molât la femine, dopo agns di matrimoni; si lamente spes di dut e jo o cîr simpri di confuartâlu. Intant lui al è za rivât a la pension e pûr nol è ancjemò timp par polsâ. Al cîr simpri cualchi lavorut.
Devant di un bon tai di verduç mi à contât un episodi che mi jeri dismenteât di tant timp.
Cincuante agns indaûr, intun dopomisdì di Istât, o jerin a durmî te stanzie plui malsestade de cjase coloniche dulà che lui al viveve, cuant che al è rivât un grant temporalon. L’aiar al sivilave cussì tant di fâ pôre. Il cîl al pareve sclapâsi a fuarce di saetis e la sô mame, mê agne, e jere rivade di bot a sierâ ben i barcons e a meti peçots pôc prime che nus plovès dentri.
Lui, contant la vicende, al veve lis lagrimis tai voi.
I mancjave tant il fat di jessi protet, difindût, indreçât, veglât.
Mê agne e je lade di là di un pieç aromai e cumò il puar al veve pierdude la femine che, come che us o ai dit, lu veve molât. Lui si sintive come vuarfin pe seconde volte. A diference di me, che o sopuarti ben la solitudin e o fâs fature a stâ cu la int.
E i disevi: “La vite e va cussì. Dai, che tu cjatarâs une altre.”
E lui mi diseve che no, nol jere plui pussibil. Nissune plui si sarès unide a lui: al veve fat cualchi tentatîf, cence sucès. Tal ultin al veve incontrât une vedue intun cimitieri, lant a cirî la tombe di un predi. Ma la robe no jere lade in puart nancje ta chê volte, stant che la femine no veve volût lâ a cene fûr cun lui e dopo a vevin pierdût i contats.
E alore jo i ai dit di no lamentâsi par chei cuatri dîs che o vin ancjemò di stâ ca e di cjapâ dome il biel de vite.
Ancje il fat di ricuardâsi di chel burlaç di tancj agns indaûr e di vê iniment la mame e dutis chês personis che al à incontrât e lis aventuris che al à fat, ve, dut chest lu ten dentri e, par me, e je une robe positive. Al vûl disi che o sin esistûts e che alc o vin cumbinât intal mont. Come che al à dit un gno amì: “I ricuarts de zoventût a son l’aliment pe vecjae.”

di Milio dai cjans (Vercingetorix)
#1828

1 comment