CC24Dicembar#03 – Di distin e di passion

#03 – Di distin e di passion

Tu sês fêr di mil agn
– cul timp rùsin tes mans –
su lis croseris,
a spartînus vias a voi sierâz
(a son par nô stradis che no si sièlzin)
Si va ad aghe
a tantis fontanis dome cui vôi.
Si va cun dople cjame
di distin e passion.
Nol rive a daidivore il cûr.
Di gnot ‘a sùnin che pas
dentri il scûr,
nus talpìnin la vegle
fin ‘e lûs di buinore.
Crist,
bocjecidine, tes croseris.

Un biel tortin di verduris. Vuê di sere o cusini un tortin di verduris par cene. Nus plâs une vore di preparâlu e condividilu te nestre cusine.

O vierç il frigorifar. Coçuts. Verze. Feta.

O lavi i coçuts e ju tai a fetis. O ciri une fersorie di misure mezane. I disvuedi une lagrime di vueli di ulive, o pii la lastre a induzion tal 6 e i poi la fersorie. Cuant che il vueli al è cjalt, i zonti  lis fetis di coçuts.

Intant o lavi e o tai la verze. Po o taiuci la feta. Intrigante la cumbinazion cromatiche o olfative tra verduris e formadi. Ancje la sielte dai colôrs e je impuartante.

Dopo 10 minûts di coture, i coçuts a tachin a inmorbidîsi. E je ore di zontâ lis droghis: curry e curcuma, sâl e pevar.

Po dopo lis fetis di verze.

O lassìn cusinâ altris cinc minûts, fin a tant che si suie. Alore si zonte la feta. Si messede.

Intant o varai piât il for a 180°.

O distiri la paste sfueade su la tecje e o clami mê fie.

E je jê che e viôt de la fase finâl: la farsidure e la pleadure cun gracie de paste sfueade su la farse.

O impiri il tortin tal for. Dopo 20 minûts un inefabil arome si spant par dute la cusine. Il tortin al è pront. E je ore di cene.

di Francesca Giorgetti (Daisy)
#1820

1 comment