CC24Novembar#15 – Cjar Jacum

#15 – Cjar Jacum

Cjar Jacum,
Mi displâs une vore di doprâ une maniere par scrivi che ai tiei voi ti somearà alc di antîc tant che il tabâr dal diaul, ma to nono, a novante agns sunâts, nol podarès doprâ altri che cjarte e pene.
O ai provât altris mûts di comunicâ, no par ultin la videoclamade che o vin fat la setemane passade; ma cuant che o soi sentât denant dal barcon i pinsirs profonts che mi nassin intal cûr a rivin corint dret intal sfuei.
E daspò lis oris, che o vês in plui a Chang Mai, no son un probleme cuant che si scrîf une letere.
Tu âs fât ben a sielzi di fâ il digital nomad! (Al è stat dificil spiegâ a tô none ce che e vûl dî cheste robe!) Ai miei timps si nasseve e si murive in tal stes puest!
Mi displâs dome che par me cumò al è masse tart par vignî a cjatâti in Thailandie.
O varès vût tant gust di cognossi di persone il to morôs Alexander.
Cuant che lu vin viodût inte videoclamade nus è someât pardabon un zovin cussì di sest!
L’unic probleme al è che nol fevele par talian e soredut nancje par furlan! Ah, ah!
Ti ai viodût cui voi ridints come cuant che tu jeris piçul… e cumò o soi plui seren.
Ti vuei une vore ben
To nono Gjigji.