CC24Novembar#09 – Riçots

#09 – Riçots

Voi celescj, platâts des ceis zelosiis che ur vuardin. Riçs bionts che i rivin aes spalis. Un nâs ancje se un pôc lunc, dut câs al puarte a pierdisi te bocje grandone che cuant che si vierç e distapone i dincj blancs perfets.
Ducj i dîs lu cjatave sentât tal pît, cul telefonin tes mans. Dome il poleâr ogni tant al cjareçave il schermi, dulinciôs.
No i jere mai stade dongje. E jere la ultime a montâ sù prin di rivâ a Udin, la coriere e jere simpri plene. No lu viodeve mai smontâ jenfri la maree di cuarps involuçâts cuintri il frêt. A scuele? A vore? Un musicist cun chei dêts luncs elegants?
Une matine che la criùre e muardeve i vues, che si vevin lassât daûr i fûcs de Pifanie, e viodè rivâ la coriere cuasi vueide. Par prin e pensà che nol sarès stât nancje lui daûr a lâ a Udin. E montâ sù che za i mancjavin i siei riçots cuasi blancs di aur.
Invezit al jere li, tant che nol fos mai smontât, a cjareçâ il telefonin. Biade, i rivà dongje plan planchin e si sentà ae sô çampe, ancjemò stranide. Biel cjalantlu di dongje al jere ancjemò plui perfet, la piel slisse cence nancje une ombrene de barbe. E il profum! Di vert e di len, un tic di flôrs.
Par no fâsi scuvierzi e fasè fente di cjalâ il telefonin dal fantat. A jerin dome fotos, simpri lui. Fûr te nêf, dongje il fûc dal fogolâr, dome la muse, dut il cuarp. Vistît di gale, cuntune cjamese, dome cui bregons curts a taiâ lens cuntune manarie, crot di lontan distirât te jerbe. Simpri crot, masse vicin chescj altris riçs.
Il ros e il cjalt a barufavin par rivâi par prin tes orelis. E veve i smursiei dal colôr dai papavars. Confondude no si inacuarzè che un altri fantat ur lave cuintri, cuntune biele bocje di ridi e une man slargjade par strenzii la spale.
“Narcîs! Trops agns! Cemût stâstu?” I disè dut legri.
Al tirà sù i voi biel cjapant timp par impensâsi dal non di chel i fevelave. Di bot il celest al lusignà sflandorôs.
E la sô ilusion e murì cuant che al vierzè la bocje par rispuindi:
“Come te stà?”
Triestin, al jere triestin…

di ?
#1804