CC24Novembar#13 – Berta a man sclete

13 – Berta a man sclete

Si dîs di me… Eh sí po, simpri mi cjapi in zîr cun cheste cjançon: Che o soi brute, che e voi pe strade cjaminant come bule. Un tango vieri vieri. O volarès che par me ancje e fos vere la part che e dîs “O sarai cussì ma plui di un al à pierdût il cjâf par mê”. Ma no.

O ai viodût cressi dute la mê famee. Sûrs e fradis. Cugnâts. E jo, che mi soi metude avonde in bande, a non fâ la mê vite.
O podarès scusâmi disintmi che o soi restade cun mari e pari par tignîju sù. Ma nancje. In dì di vuê o sai ben che no je stade une decision. Al è stât nome un lassâ passâ il timp puartant indevant la locande dai vecjos.
Simpri chês nûf o dîs musis, cualchidune ripetude, a gustâ e a cene. Magari e je dome une forme di isolâsi dal fûr, di no cjapâ riscjos.
“Berta, ce bon che ti cusinis!”
“Berta ce brave che tu sês”.
“Berta cemût fâstu a dâ simpri la opinion juste?”
“Berta o fasarai ce che tu disis par recuperâ la morose. Graciis”.
E tancj di chei oms, in tal ringraciâ, mi cjapin la man jenfri lis lôr. Ma nissun – mi visi – al veve mai considerât di cjalâmi come femine. Dut câs o soi simpri la coge – psicolic – l’amie dal grumâl lunc e dai cjavei peâts e cence nissune gracie. E la tabaiade e dure propit il necessari par ricevi i miei conseis, sedi pe vite (da me, che no ai nissune) sedi pal menù, daspò di chel mi vuelin lontan.
Vuê a buinore, come simpri, mi soi metude a cjantâ chê letare devant dal spieli. La mê preiere cun ande di litanie. Daspò, come simpri, o soi tornade tal jet une mieze orute par lassâ mangjâ a la mê amie. Une piçule vendete cuotidiane cuintri i miei aventôrs di simpri, prin di ricevi lis provistis e metimi a cusinâ.
Come simpri, o ai slungjât la man par tiere. Le ai vierzude. Il tocut di panzete al a tacât a molâ il so arome. Jê aromai in fidance e je vignude cuasi drete a mangjâ. Le cjalavi cun discrezion. La code si moveve come chê di un cjan content. Cuant che e à finît la pitance e je restade un tic cuiete, i vogluts legris a cjalâmi come in gradiment. Daspò e je tornade tal so bûs.
E, cumò, come ducj i dîs, o soi za pronte par cucinâ e lassâmi cjapâ la man.

di ?
#1808