CC24Otubar#17 – Problemis di inzornament dal software

#17 – Problemis di inzornament dal sofware

La sô configurazion e jere stade metude adun daûr di une schirie di normis che a someavin  jessi cjapadis di une civiltât prime di Colomp, ma a jerin dome ce che al veve zupât di piçul.
E sì, al jere stât tirât sù cence telefonut e cuasi disprivât di television. Cjatâsi di front dal schermi al capitave dome par une cunvigne familiâr, che e sucedeve di tant in tant e che di solit e vignive ruvinade pes barufis. Te inesistence dal telecomant, si scugnive decidi cui che al jere a dâ sù o a sbassâ il volum tal aparât.
Il “fai da te”, in chei agns, no jere une robe parigjine, si ben une dibisugne. Fâ sù un karting o pûr comedâ une biciclete no jere robe da inzegnîrs: cence il tutoriâl di youtube ti restave dome di metisi a fâ un tocut di atenzion tal dismontà e tornâ a meti dongje dut, une volte riparât.
Par fâ i compits, in assence di informazions a puartade di man, stant che Larri Page nol veve ancjemò mulinât Google, la biblioteche e vignivi a jessi l´unic puest dulà cjatâ alc e no un Starbucks par bevi un brut cafè american. I gjenitôrs, cun mans di contadins, ti podevin dome dâ apene un indreçament de vite o di ses, ma no di fisiche, chimiche o spiegâti cui che al fos Kant.
E sì, lui al jere stât tirât sù daûr di une velocitât di 33 zîrs e cumò Spotify e dute la vite a van a mil voltis tant. Ogni tant al veve voie di cjapâ la De Lorean par tornâ te ete passade, ma cumò, invezit, al è daûr di un schermi a domandâ ae Inteligjence Artificiâl cemût fâ il gjenitôr… cun mans di contadin.

di 32
#1786

Note: opare di Afro Basaldella (Pianeta Fortuna)