CC24Setembar#11 – Vuelme nere

#11 – Velme nere

Si cjatave intun puest dificil di definî. Intun prin moment al pensave di jessi di bessôl e invezit, dopo un pôc, scrutinant dulintor, al veve capît che cun lui a jerin ancje altris. Nol saveve cui o ce che a fossin. Al jere chel che lu tormentave. Ator di lui la scuretât plui scure che plui scure no si podeve. Dongje di lui moviments riscôs, un svuatarâ, un odôr di velme patoche.
Sì, cumò al sintive ben il tuf.
No si visave cemût che al fos capitât in chê sorte di lûc che al sameave a une pissine plene di muarts. Lui al jere cu la velme a mieze vite. Dal alt a rivavin ogni tant dai tarlups e si sintive un rumôr come di elicotars. Par un istant i faserin viodi la brute realtât dulà che si cjatave. Cui scheletris che a torzeonavin te pissine, movûts di no si sa ben cualis creaturis.
Cualchi ore prime al jere cul amì Zuan intun traghet sul flum. A stevin cjalant un film horror cussì spaventôs che al scugnive sierâ i voi ma tal stes timp al voleve tirâ indaûr la pelicule par rivâ a frontâ lis senis plui pesantis, armantsi di coraç.

Po, no si sa cemût, il traghet al jere fondât, l’amì Zuan disparît e lui si cjatave ta chel lûc neri plen di vues e di no si sa ben ce.
Di colp doi voi sflandorôs a saltarin fûr de aghe par cjalâlu. Doi voi menaçôs come di retil. Al pensâ a un crocodîl, bestie no rare ta chês contradis.
Al tacà a trimâ come une fuee, strenzintsi i braçs, spietant l’atac de orende bestie. Come par meracul i doi voi dal retil si svicinarin l’un cul altri e a deventarin un sôl. Il voli al sameà spostâsi e pontâsi adalt parsore di lui.
Po il scurôr si sfantà e parsore al viodè une grande lûs. Ator di lui, ce che prime al jere un landri neri, al jere deventât dut blanc.
Une robe di no crodi!

“O soi in paradîs” al pensà.
Podopo al intindè la vôs di un om. Lu viodè, dut vistût a blanc. Al pensà che al podeve jessi dome un agnul.
L’agnul al disè: “Meracul!  Al è jessût dal come!”

di Atile
#1752