CC24Setembar#06 – Innomenât

#06 – Innomenât

Se tu domandis ai sienziâts a ti disin che i nûf mês i coventin al frut par cressi dentri de panze de mari. Ma o crôt che a scugnin restâ li dentri par sielzi il lôr non. E si pues ancje no rivâ a chel just, perfet e soredut chel che nol sarà un motîf di vergogne par dute la sô vite.
A son chês feminis che a san trops fîs che a varan e cun di plui a àn bielzà sielzût ancje i siei nons, prin di vê nancje une pussibilitât di cjatâ un om sul cîl dal mont.
Altris a tachin la ricercje a pene che a scuvierzin di jessi plenis, cul jutori des feminis de famee, des amiis e des coleghis dal ufici, biel lassant il pari fûr de gare e rassegnât.
Une volte si doveve spietâ la nassite par savê il ses de creature, si veve di sielzi doi nons e daspò un al vignive butât vie cuntun fregul di malincûr.
Ma cumò che si sa dut, che si pues viodi, ancjemò te panze, la sô musute in 3D, a son chei paris che a vuelin meti “Diego Armando” al fi che al stâ daûr a rivâ, e za lu àn fat soci de scuadre dal lôr cûr. E pûr i àn comprât une piçule maiute intant che la mari si insumie cul piturâ la sô cjamare cun altris colôrs.
Ma sul discors dai nons ‘nd è une mari che e vinç su dutis. Pal prin fi, e veve sielzût Mari Indrì fin dal principi. Al jere un frutin colorât e scjassôs. In trê agns cuant che e capì di tornâ a jessi plene, e jentrà in crisi. Cemût cjatâ un altri non cussì perfet di chel prin! I mês a lavin vie e ancjemò no si cumbinave nuie, fin che al setim e rivà di bot une frutine piçulute e che no vaìve mai. La mari, strache e scaturide e decidè di zuiâ sigûr e i de di non Marie Enriche.
Pe tierce gravidance al tacà un mont di scomessis jenfri i parincj, lis amiis e dut il borc. E pûr il miedi al veve metût dentri bêçs tant che la plui garbe viere dal paîs.
Cuant che un secont frut al è par fin nassût a varessin vût dâi ducj chei bêçs ae mari che e veve pardabon freât dut il paîs. E veve sielzût di non Indrì Mari e vonde monadis!

di ?
#1747