CC24Setembar#01 – Nissune come te

#01 – Nissune come te

Ma dulà puedio cjatâ une altre come te?
Cidine cidine, cu la tô ande rafinade tu mi sfioris lentamentri par stâmi plui vicin. Tu stâs vulintîr a osservâmi cun chei voi cussì grancj e lusints che mi trasmetin in continuazion tant afiet, ricognossince, rispiet, o pûr che mi domandin ancjemò cuissà ce…
Ogni matine ti plâs dismovimi a la tô maniere: a planc a planc tu mi fasis sintî il to curt respîr su la mê muse, fin che o vierç i voi. E cuant che plui tart o soi pront par lâ a lavorâ, cuissà parcè ti pâr che o voi vie par simpri, magari che ti bandoni, come forsit ti è za sucedût cun altris…
E alore i toi voi si jemplin a colp di malincunie e di ansie, al pinsîr di restâ dut il timp cence di me, bessole dentri chei cuatri mûrs, che cumò ti deventin come une preson. Cussì ogni volte mi si strenç il cûr a slontanâmi di te; e se ancje o provi a consolâti: – Dai, no stâ a fâ cussì, che o torni prest. – Mi pâr che tu fasis la ufindude, zirant a plancut la tô biele musute di chê altre bande…
Ma intal moment che o torni e che o vierç la puarte, al somee che si inlumini dute la cjase, e alore e je fieste grande cuant che tu mi vegnis intor cun dute la tô sancirie spontaneitât, cuntun calôr e un traspuart che nissune finore mi veve mai dât. No ti cambiarès cun nissune altre al mont, e o sint che mi si impie di lûs dute la mê anime, di tant ingropament, e cussì ogni volte ti strenç fuart fuart cuintri di me.
In chei biei moments o ringraci il Signôr che mi à metût su la tô strade, e no dismentearai mai la prime volte che ti ai cognossude, intal mieç dal parc, in chê sabide dopodimisdì. Ti ai viodude za di lontan, cussì spauride, a torzeon di bessole, e forsit plene di fan. Ma tu jeris ancje cussì ninine e elegante intai moviments, come une vere regjine.
Tu mi âs fat ancje dûl, e je vere, ma tu mi plasevis propit tant, e no ai resistût a cirî subite di fâ amicizie e di mateâ un pôc cun te. A la fin mi soi fat coragjo e ti ai invidade a cjase mê, pûr savint che tu podevis ancje jessi une vagabonde, vignude di no sai dulà, o magari scjampade vie di cjase, e vê vût cuissà ce tantis altris esperiencis…
Ma la tô bielece foreste, un pôc misteriose e cualchi volte impenetrabile e à fat il rest: o ai sintût alc di fuart dentri di me e cussì o ai lassât che decidi dut il gno cûr… E no mi soi propit mai pintût, anzit.
In chel pôc timp che o vivìn insiemi, nissune mi à mai figotât tant come te: tu sês simpri plene di ligrie, socievule cun ducj; ti plâs zuiâ, cjaminâ cun me intal bosc e par dut. No tu âs mai vût pretesis e tu si contentis pardabon cun pôc. Ti baste sintî la mê vôs e vê spes di me cualchi cjarece; tu gjoldis sinceramenti de mê presince, che ti dà sigurece e protezion, e che oramai ti à dât ae fin un sens positîf e profont ae vite. Dut chest jo lu stoi leint tai tiei voi ogni volte che tu mi cjalis, e ogni volte o resti incjantât, concuistât, disarmât…
O scomet che oramai tu par me tu si butaressis ancje tal fûc par salvâmi, e che tu saressis pronte a tirâ fûr i dincj e lis ongulis par difindimi, se casomai jo o fos in pericul, parcè che il to amôr al è unic e totâl e la tô devozion jo le sint fin in font in ogni to respîr. Al somee difat che tu vuelis dîmi: – Graciis che tu mi âs gjavade de strade, parcè che o varès fat di sigûr une brute fin; graciis che tu mi âs dât un tet, e di mangjâ. E soredut graciis par l’afiet e la amicizie che jo no ai mai vût in dute la mê vite. Graciis ancjemò di dut !
Al è tant biel cuant che di sere tu ti distiris vicin di me sul divan, a planc e cun chê gracie naturâl che o ai simpri amirât. E alore no podi fâ di mancul di cjareçâti a planc e ogni tant o provi ancje a fâti dispiets, par sintîti magari a rugnâ e par gjoldimi chê espression di fastidi cussì strambe e ridicule che tu fâsis e che mi plâs tant.
Une sere però o ai forsit volût esagjerâ, par vioditi un pôc plui rabiose e par sintîti finalmentri a protestâ. E alore ti à vignût fûr de bocje prime un: – GRRRR! E dopo un: – BAUUU! BAUUU! Veramentri speciâi…
Va ben, Lola, o ai capît..ma al è cussì biel fâti dispiets!

di ?
#1742