#19 – Un sclip di resine
“Ma ce biel paisaç ce tu âs dissegnât! Tu tu âs dome di finî di colorâlu.”
Marco al jere strac di scoltâ lis cjacaris de so mari cun lis amiis. Il gustâ tal viert al jere terminât da un pôc e chel al jere l’ultin dì di vacance in mont.
Al jere bravonon in dissen ma in chel li che al veve fat al jere alc che nol i plaseve. Al alçà i voi e al fo caturât dai fuams dai arbui di lontan mots di il vint. Al cjalà so mari e lis amiis cjapadis in lôr discorsis incomprensibilis. Al jere il moment just par slontanâsi e lâ bande chel piçul bosc e stâ di bessôl.
Rivât ai pits di un grant arbul, al de un cuc indaûr e content che, in aparence, nissun al si veve visât di so assence, al svicinà al tronc maestôs.
La scusse e dissegnave tais profonts e iregolârs. Di tant in tant e saltave fûr cualchi furmie che tignive daûr un percors cuasi stabilît.
Facil, li dongje, al jere un furmiâr, e il pinsîr lu meteve in agitazion. Un strani businôr lu discjolè da la so osservazion.
Al improvis un inset pelôs si svucinà svolaçant cence gracie, ma chest fo a vonde par falu saltâ e sbati cuintri la scusse dal arbul.
“Vie, viee!“ Al sberlà cun dute la vôs che al veve in tal so cuarp. So mari i corè dongje par judalu.
Marco, gjavant une man dal arbul, si inacuarzè di vê alc tacadiç e dal odor aromatic e fuart tacât a le palme.
“Ce isal è sucedût? Sta bon, o soi ca!”
“Al è plen di insets!” E cjale la me man!”
“Ma nol è nuje! E je dome un sclip di resine! L’arbul la bute cuant al à une feride, e cussì si cure di bessôl.”
“E duncje ancje i arbui a patissin?”
La mari i fà bocje di ridi e judantlu a slargjâ i braçs i u strenzè ator al tronc intun abraç.
Il frut al sierà i voi e al provà la sensazion che la scusse no fos plui ruspe e dure e che in cualchi mût l’arbul al tornàs chel at zentîl e tenar.
Cumò Marco al saveve ce c’al mancjave al so dussen: il so gnûf grant ami arbul!”
di ?
#1733
