CC24Avost#17 – La cjandele

#17 – La cjandele

Mê mari e sledrose la puarte!
— Al finìs i agns to pari e la torte e je cuasi pronte. Chê che i plâs a lui, ma mi mancje la cjandele. Puedistu viodi tu? Daurman!
O stoi lant fûr di cjase. Al rugne il timp e par pôre di travanâmi, o brinchi il pastran picjât tal camarin. Pesant, lunc, neri. Di sigure la plui brute palandrane dal mont. Esemplâr unic a jessi stât intiessût. O somei chel di Matrix! Va ben istès.
Moviti! Sveiti! Spessee! Lis racomandazions a rivochin tes orelis.
La buteghe di Esterine e je sierade il miercus dopomisdì. Dulà voio a bati une cjandele! Intant e sbivicje la ploie. O tiri sù il golet cul baticûr. O ai pôre. Ma di cui? Pôre di cui? O sint i glons de cjampane. Sono lis oris o pûr isal jespui? O messe? No sai, ma cence pensâ o soi za dentri in glesie. Odôr di incens. Ma parcè… Iluminazion! Ce stupit! Il puest miôr par cjatâ une cjandele!
O soi denant dal altâr maiôr. No si rabiarà il Crist se o cjol une cjandele. Miôr no scherçâ. Un euro. La inflazion si fâs sintî dapardut! O sgarfi tes sachetis. Une palanche di vincj centesims. Alc al è alc. Un rumôr di saltel. Il puarton de glesie al piule. Cualchidun! Mi cjali ator par platâmi. O soi za dentri il confessionâl.
Strent ta chel tuguri di len, mi somee di scjafoiâ. Cui isal cumò? Une vôs. Dôs. Trê. I bancs a crichin. Int che si bute in zenoglon. Ce ore ise? Mi rint cont di jessi tal scûr. O palpi in bande de spalete. Velu il cric. Lu sburti. Une lûs flape. L’orloi al segne siet e un cuart. Ritart! Ritart grandonon!
— Si è piade la lûs. Il plevan al è za rivât! E berghele une vecjute.
No pues scjampâ! Presonîr! In curt mi cjati a perdonâ pecjâts a diestre e a çampe. Finît il lavôr, o jes dal confessionâl. Lis vecjutis pletis a scosolin avemariis. Ind ai dadis tantis in mût di vê il timp par podê mocâle vie.
Fûr la ploie e sbivicje ancjemò. Une man mi tire il pastran. Un sgrisul! Mi ziri a colp cui voi scocolâts.
— Siôr plevan… — O sint. — Al stave smenteant la sô cjandele.

di Massim Furlan (Brene Sfolmenade)
#1732