CC24Avost#15 – Narcîs

#15 – Narcîs

Il pari di Narcîs, Diu lu vedi in glorie, al jere paron di no si sa cetancj apartaments, cjasis, terens e machinis. Cun di plui, tes sôs fabrichis a lavoravin tancj cristians. E no dome tal so paîs, ma ancje vie pal mont. In dute chê bondance, chel frut al jere cressût viziât e malecreançôs. A so pari al podeve domandâ ancje la lune che je varès comprade. E une volte muart chel om, za di fantat, jessint fi unic, Narcîs, al veve ereditât dut chel ben di Diu. Fin di piçul, e di fantat par tant che al jere arogant, a lui nuie al podeve jessi neât. E no dome la robe che si pues vendi o comprâ. Lu stes al jere cui siei amîs, ma soredut cu lis fantatis de sô etât.
Puaretis, lis doprave dome pe lôr bielece e pal lôr zovin pêl, ma soredut par mostrâ a cui che i stave dongje che lui al jere un om potent. Il timp, intant, al jere passât e pai agns che ancje lui al veve intor, al jere deventât un om. Pecjât che tal so cûr restave simpri  la arogance e chel spirt di soprafazion che al veve fin di frut .
E une dì leint il gjornâl al à scuviert che Lisute, une fantate dal so paîs, par tant che e jere biele e veve vint il titul di Miss Europe. Subit, par tant che al jere presuntuôs, Narcîs al pense che ancje chê frutate e veve di deventâ robe sô. Dit e fat. Nol è passât tant timp che al à svicinât la frute. A dî la veretât, Narcîs, di presince al jere un biel fantat e in aparence ancje un om ninin. Chê frute, viodintlu tant graciôs, siôr e ancje ben istruît, cun lui subit si jere lassade lâ. Zornadis bielis e di passion. A gustâ e a cene tai ristorants di lus, infin tancj viaçs ator pal mont. Chei doi fantats, fintremai, si jerin inamorâts. La lôr storie e someave, par dabon, une biele flabe d’amôr. Pecjât che une sere al è sucedût un patatrac. Narcîs, no vent pierdût il so spirt di soprafazion, si è impensât che par Lisute, cuntun so amì al veve scometût che in pôc timp di lui ancje jê si sarès inamorade. E vent vint chê scomesse, sigûr che chê frutate e durmìs e no lu sintìs, i à telefonât par scuedi ducj i bêçs che al veve vint. E invezit Lisute e à sintude ogni peraule. Rabiade come une imbesteade, saltade fûr dal jet, lu à cjapât a sberlis, sgrifât e infin sbatint le puarte e je tornade a cjase sô.
La cuaie no va simpri pal stes agâr, ogni tant lu salte. E cheste volte e à saltât chel di Narcîs. E vêlu là, ancje se potent e siôr in scjapinele cun tant dolôr tal cûr, par Lisute che lu veve par simpri  bandonât.

di ?
#1729