CC24Avost#14 – La mari

#14 – La mari

Il frutin al duar sul gno pet dopo che i ai dât di tete. Al à sîs mês. O sint il so calôr. E je une robe maraveose vê une creature che e dipent di me, che jo o nudrìs cul gno amôr e che mi è costade tant. Che o viodarai cressi e che, come dutis lis maris, o prei par che e vivi a lunc, di sigûr cetant plui di me parcè che nol po jessi che une mari e sapulissi il propi fi o fie.
No. Chel nol sarà mai! Il gno frutin al cressarà. O darai dute me stesse par fâlu cressi in salût, par dâi une istruzion, par compagnâlu intai trois intorteâts che nus ufrìs la vite. E, mal auguri, al vignarà il moment che il gno frutin al deventarà om, se al vûl…
E jo e gno marît i darìn dome il miôr di nô!

O soi une mari ma no lu soi stade simpri.
Une cure cun ormons estrogjens mi à trasformade. Mi è cressût il pet. Mi son diminuîts chei pêi orents, soredut chei su la muse che no podevi sopuartâ. O soi simpri stade dentri di un cuarp sbaliât. O ai simpri vude une vite scalembre, massime tai prins agns. Ma no mi è mai mancjade la mê cualitât plui grande. Clamìnle sgrimie, va.
O soi simpri rivade a saltâ fûr dal paltan, se propit o vin di fâ un parangon. Dal paltan de tristerie e de miserie. Miserie no mê ma di chei che mi àn simpri tibiât!

Mi soi fate ancje tirâ vie chel argagn tal mieç des cuessis. Il gno frutin lu vin vût grazie a la maternitât sostitutive. E je stade une altre femine che lu à parturît par nô.
Ma chest frutin al varès dibisugne di une sûr e cumò o ai cjapât la decision che la creature e vignarà fûr di me!
Une decision impuartante, chê di fâmi traplantâ une madrasse.

di ?
#1728