CC24Avost#12 – La tampieste a je finide

#12 – Le tampieste a je finide

“Mandi, o soi Nevio, e ind’ ai problemas cul bevi”
“Mandi, Nevio” e dîs le piçule fraie di int.
Four i fulmins i saetin intun cîl neri che al à glotût ogni lûs, ogni stele, ogni speranze.
Nol sta plovint inmò, ma il cîl al cride e al vose come une legjon di gjaui.
Une cuindisine di omps e di feminis a son sentâts a semicercli – vecjos, zovins, un tic di dut.
I no conosc nissun.
Sui mûrs, picjâts come condanâts a muart lassâts a infraidî, vecjis circolârs stampadis in comic sans e poster motivazionâi CE LA FARAI ANCHE TU.
“Al è il gno prin viaç in chest club, e soi content di sedi chenti cun voaltris”.
Un sior cençe cuasi dincj a si inumidìs un dêt e cun chel al cîr di gjavâ vie une magle tal denant dai bregonuts intun puest inapropriât, come se al fos di bessôl. Al è cjâlt inte stanzie, ma four al sta tampiestant e i vin di tignî sierât. Une siore su le setantine mi sorît materne, i voi cerclâts di grispis, antighis come crets.
“No soi un grant bevidôr, ma i ai pensât che nol convente sedi grancj bevidôrs par vê bisugne dal jutori di chei altris dal moment che la mê vite je lade sprofondant jù velocementri intun plan inclinât”. I tiri il flât, i sint las lagrimas vignîmi jù e il familiâr savour di sâl sui lavris. “Forsit no lu soi nencje” i dîs, ma nissun al somee fâi câs.
“Dimprin i ai scomenzât a pierdi cualchi amî: prime lontan, dopo simpri plui cjars e vicins. Dopo je muarte mê mari, al improvîs, come al improvîs i ai pierdût gno pari – i erin zovens, soi stât rabiât cun lôr par tant timp come se i vessin sielt di lassâmi di bessôl. La sielte le à fate la mê femine, e jê e mê madone son ladis vie sbatint la puarte. Divorzi. Sessante agns, no ‘nd ai une famee, se no cualchi cusin lontan: se i stoi mâl i ai di rangjâmi bessôl. I ai un grump di amîs – al è vêr – ma amî nol è une famee, nol è un progjet, nol è une cjase. E in d’ai vût dîs dulà che suicidâmi al someave naturâl, cuasi un solêf. Ma and è un probleme”.
I tiri su cul nâs. Nissun al sta cjalant il telefonin, ducj i mi cjalin. Al è cjâlt inte stanzie cumò, ma no si pues vierzi – fûr al tempieste. Cualchidun al cjale le robe di mangjâ su le taule.
I sieri i voi.
“I ai un odi PROFONT par il sunôr de mê vôs cuant che si lamente” i dîs, e i lassi che lis peravolis a danzin in tal silenzi de stanzie. Ju sint respirâ.
“I odi comiserâmi, fin tabajâ di dut chest – ma no par cualchi stupit machismo o ce” i sint il gno pet che al va sù e jù infervorantsi.
“Ogni dì mi viôt circondât di int che a si sint crevade, sbaliade, fate a tocs de vite e che passin il timp a pensâ al futûr come un puest glaçat – SIN DUCJ ROTS! DUCJ. L’Univiars al è un puest orent che a nus masane te muele de sô indiference, nol sa nencje che i esistin. E no vin sigureçe se no lis nestris pôris, e il fat che dome lis robis brutis no finissin mai – le bielece è je delicade e provisorie par sô nature, une coincidençe intun Univiars di brutece. Ma sâtu ce? A voul snait, cazzo! A voul snait par dâi cuintri, ogni dì: e cuant che tu sês di bessôl tu âs di dacjel di bessôl, tant la int e mour – e mour dute par nature. Mal doi di bessôl, e nol è istint di sorevivince. Al è rabie. Le rabie e je lis cuatri ruedis motricis che mi tirin four dal pantan ogni dì e mi fasin vignî voie di essi uçât come il fîl di une lame. Altri che rot, altri che vaî!”.
Mi soi infervorât.
I sfladassi.
I vierç i voi: le stanzie e je vueide come se a nol fos mai stât nissun.
Forsit nol è mai stât nissun chenti. Nencje jo, a dîle dute.
Le stanzie e je vueide. Ma four, il temporâl al è finît.

di ?
#1726