CC24Lui#01 – Libars di lâ vie

#01 – Libars di lâ vie

La fantate e cjaminave cul cjâf pleât par platâsi dal soreli spietât. Cuntune man si protezeve la panze dulà che la vite i cresseve ogni dì. E veve domandât ae viele comari che e veve fat nassi ducj e insiemi a vevin contât lis lunis de ultime volte che i jere vignût il sanc. La viele i disè che di pôc e scomençarà a sintî lis petadis di so fi. Une muse di ridi dolce i iluminà il vîs picinin.
Biel cjaminant si cjalave i pîts intant che e zuiave che il dêt grues al jere il cjâf de famee, che al puartave indenant il grup e ducj lôr i lavin daûr. Grant, un gigant cui prins cjavei grîs, l’om si sveave prin dal cricâ dal dì e al nasave l’aiar par viodi se i pericui de gnot a jerin lontans. E ju puartave simpri indenant.
Di dîs la fantate e nasave alc di diferent, un odôr fresc e gnûf che no cognosseve. A son rivâts di gnot a ôr dal so mont tal scûr sierât, no jere la lune par judâiu. Si sintive il sunôr di tantis bestiis che a ruzavin lontanis e l’aiar al jere umit tant che daspò de ploie, ma i siei lavris a jerin salâts. I fruts e lis feminis de famee si strenzevin scaturîts, ma i oms si vantavin di une olse finte intant che ancje lôr si svicinavin al grup. Si jerin indurmidîts stracs e malfidents.
Di matine la famee e decidè di traviersà chê aghe par cirîsi fortune. La fantate e lassà la sô tiere cence mai savê cemût clamâle.
“Afriche” e disè il professôr ai arlêfs che no si pierdevin une peraule.
“I nestris antenâts a son partîts setante mil agns indaûr di un lûc al sud de Afriche. Si crôt che ducj nô o vin tal nestri DNA un gjen comun che al ven di une sole famee, no plui di dusinte personis.”
Un arlêf maraveât al olsà di interompi il so discors: “Profesôr: cemût àno lassât il continent se a jerin tal sud dal Sahara?”
“A àn traviersât il mâr che in chescj dîs al jere cetant bas di permetiur di rivâ te penisule arabiche. E di li, si son sparniçâts par dut il mont”.

di ?
#1689

Leave a reply:

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît