CC24Jugn#17 – Siruc

#17 – Siruc

Par solit un testament al ven viert cuant che il muart al è za sot tiere. Ma cheste volte il dotôr Manlio Costantini, di profession nodâr, al veve pocât la puarte di Nardin che e jere scuasit miezegnot.
Un scuret al veve ciulât. La muse di Nardin e jere comparide.
— Cui isal cumò? O ai me nono su la bree. O stoi spietant il plevan par il vueli sant. No son oris di lâ pes cjasis!
Il zovin nol veve ricognossût il nodâr, seben che al fos un amì di famee di cetant timp.
— Nardin, o soi jo, Manlio. Al è miôr che tu mi vierzis. Crodimi! O ai il testament di to nono te sachete.
Dopo vê lete la cjarte, Nardin al veve cjalât in muse il nodâr.
— Isal un scherç? Cemût si puedie fâ une robe cussì?
— La ereditât e je vincolade. Bisugne rispietâ lis volontâts di to nono. Tu cjacare cul plevan. Jo o viôt doman cul capo dai carabinîrs.
Pre Pieri, dopo ve savût, al veve cjalât il cîl, come a domandâ confuart a Diu.
— La viôt dificile la volontât di to nono. E se la casse e cole vie dilunc il viaç? E se mi sbrissin i cjandelîrs? O la crôs?
— Che al fasedi par la miôr, siôr plevan. Par ringraciâlu o fasarai une buine ufierte ae glesie.
Pre Pieri al veve acetât. Cun di plui si jere impegnât a cjacarà cu la perpetue che e preparàs la int che e veve di compagnâ la casse viers il cimitieri.
L’indoman Manlio al veve sigurât Nardin che ancje i carabinîrs a jerin pronts, disint che no vevin mai assistût un funerâl in cheste maniere. Ma sul servizi pal citadin no si discuteve!
Finide messe, ducj a jerin pronts. Il corteu funebre al scomençà a movisi ben planc. Il requiem aeternam al judave a scandî i pas de int, che dopo pôcs metris e veve za cjapât une buine ande.
Ogni tant i pizighets che a puartavin la casse a spale, si imberdeavin, ma judantsi l’un l’atri, a levin indenant cence fature.
Doi oms, sentâts fûr de ostarie a cjalavin la procession che si indreçave viers la sepulture.
— Ciert che il vecjo al à tirât un bon scherç a Nardin, scrivint chê cundizion sul test.
— Un furbastri! Al à pretindût che il funerâl al les de glesie al cimitieri, cjaminant par daûr. Al jere di spietâsal di un che al veve come sorenon Siruc!

di Massim Furlan (Brene Sfolmenade)
#1677

1 comment