Si che, domenie forsit o varês sintût, la scuadre furlane dal Zio Pino Kobe e à vinçût i campionâts talians di baskin, batin in finâl la scuadre di Cremone par une grampade di ponts. E jenfri chei de Zio Pino Kobe, al è dentri nuiemancul che il nestri Ricart, il Piçul aiutant di Contecurte. Jacum ancjemò nol à fat cutuardis agns, ma o restin in spiete che ancje chel si fasi valê.
La finâs si davuelzeve a Lucca, intai dîs di vinars, sabide e domenie. Doi zirons e e rivave in finâl dome la prime. In nestris a àn vinçût dutis trê lis partidis, une vore ben lis primis dôs, cun cualchi fature la tierce. Dut câs, a son rivâts in finâl cu la scuadre plui titolade e…. le àn batude! Se volês savê alc di plui sui risultâts des finâls e viodi cualchi fotografie, vait su la pagjine facebook de Zio Pino.
Bon, ma stant che o vin la fortune di vê un campion talian di baskin in cjase, induvinait ce che al à fat l’ostîr? E nie, si è scaraventât a Rivolt a puartâi un premi al campion talian, juste par fâ un pocje di fieste, ma soredut par sbregâi vie une interviste esclusive e un servizi fotografic! Ve ca la interviste a Ricart.
O: Mandi Ricart, prime domande, ce numar âstu zuiât, intes finâls?
R: Numar 2. Par dutis lis partidis. In campionât o vevi zuiât ancje cul 1, ma a Lucca soi tornât cul doi.
O: E des aversariis? Ce mi dîstu?
R. Bon… lis primis dôs partidis a son stadis plui facilis. Cun Isola Vicentina e Borgomanero ancje il punteç lu dîs (82-56 e 94-70). La tierce invezit, ancje se nol somearès e je stade plui dificile, stant che fin a miezis o jerin a pâr. Dopo o vin vinçût 93 a 78.
O. E la finâl. O sai che li a àn zuiât i plui esperts, ma dut câs e devi jessi stade emozionante.
R. Eh, sì. O jerin simpri a pâr, ogni tant lôr a lavin parsore, ogni tant noaltris. Ma ae fin, cu doi tîrs libars sul finâl o vin rivât a comedâ Cremone, che e je la citât dulà che al è nassût il Baskin. Al è stât come une vitorie te vitorie.
O. Eh, sì, soredut se o pensìn che il baskin di Zio Pino al è nassût dome 5-6 agns indaûr, ancje se al è dal sigûr la scuadre plui fuarte dal Friûl. E de esperience, ce mi contistu?
R. Biel! La citât e jere biele e joibe o sin rivâts a lâ a viodile, comprendût il palaç cui arbui adalt. Ma po dopo o vin pensât dome a lis partidis. E o sin rivâts cjase domenie di sere une vore stracs ma… une vore contents!
O: Ma il prossim an? Varês mighe voie di vinci ancje il prossim an?
R: Sì!
E cun cheste rispueste, la nestre interviste e je finide, e o vin pensât di fâ fieste cun ce che al jere dentri des copis… E stant che ancje Jacum al è il futûr dal baskin di Zio Pino, ve che o vin premiât ancje lui, cussì a vevin plui caramel… ehm, plui sodisfazion!
Un brâf a ducj chei de Zio Pino ( a son ben trê scuadris, mighe une) e a ducj chei dal baskin regjonâl. E nie… o sin seneôs di viodi il campionât dal prossim an.
