CC24Mai#09 – Une gnot in Matungo

#09 – Une gnot in Matungo

O vierzei la puarte de cjamare, o volevi visâ a gno fi Alfrêt co jeri tornade prin dal stabilît. No impiai la lûs.Te scuretât de stanzie o intraviodei che gno fi nol jere bessôl. Tal divan dacîs si calumave une altre persone. Zirant i tacs in ponte di pîts o jessìe cidine, sierant adasi la puarte.

Tal doman, intant che i trê o fasevin gulizion, Alfrêt al contà ce che al jere sucedût. Savint che jo o sarès rivade sul tart, al veve decidût di lâ ae discoteche “Matungo”, al voleve cognossi il puest dulà che so fradi Marc, doi agns indaûr, jessint de sale di bal, sturnît dal alcol, vuidant la sô machine al veve provocât un incident che i risultà fatâl.

Te discoteche, Alfrêt al viodè un zovin che in aparence i ricuardave so fradi, ancje lui al jere masse legri, al brancolave. Alfrêt i le daûr, e viodint che si direzeve viers une machine, al sintì la vôs di so fradi che i diseve: Judilu! Judilu!, che no i passi lu stes che a mi. Par chel lu puartà a durmî a cjase.

Cuant che il zovin al sintì Alfrêt, lu ringracià e si presentà disint che si clamave Marc. Al sintî chel non, mi vignirin i sgrisui, il passât si mi presentave tant vivementri che o scomençài a lagrimâ, viodint che ancje Alfrêt al jere ingropât.

Finide la gulizion ju compagnai ae puarte. O abraçài Marc disintji che al tornedi a cjatânus, che al sarès stât simpri benvignût. Comovude e cun lagrimis tai voi ju viodèi slontanâsi dilunc la stradele.

di Galliano di Buenos Aires (Fuschi)
#1669